P38M shabu sa parcel, buking

ni Gina Pleñago @News | April 2, 2026

Photo: Ang inabandonang parcel sa Central Mail Exchange Center (CMEC) sa Pasay City na nakuhanan ng mga hinihinalang shabu na nakasiksik sa mga foot massager, motorcycle jackets, at steel roller. (Gina Pleñago)

Nadiskubre ang tinatayang P38 milyong halaga ng hinihinalang shabu sa tatlong inabandonang parcel sa Central Mail Exchange Center (CMEC) sa Pasay City, Martes ng hapon, ayon sa Philippine National Police-Aviation Security Group.

Batay sa ulat ng AVSEGROUP, tumitimbang ng 5,691 gramo na katumbas ng P38,698,800 halaga ang hinihinalang shabu sa mga parcel na nagmula sa Canada, Pakistan, at Zambia, na ang mga recipients ay pawang sa munisipalidad ng Cavite.

Naharang ang mga parcel matapos sumalang sa cargo x-ray screening ng Bureau of Customs at ini-report sa NAIA Inter-Agency Drug Interdiction Task Group.

Agad isinailalim sa manu-manong pagbubukas ang mga pakete kaya nakumpirma sa kontrabando na nakasiksik sa mga foot massager, motorcycle jackets, at steel roller.

“This operation highlights our vigilance and the strength of inter-agency coordination in securing our air cargo system. We remind the public to remain cautious and never allow their identities or addresses to be used for suspicious shipments, as authorities will relentlessly pursue those involved in illegal drug activities,” ani P/Brig. Gen. Dionisio Bartolome, Jr., Director ng PNP AVSEGROUP.

P23M shabu sa mga CCTV, naharang sa NAIA

ni Gina Pleñago @News | February 20, 2026

Photo: Ang mga umano'y shabu na inilagay sa loob ng lalagyan ng idineklarang CCTV kits  sa OBC warehouse sa NAIA Complex Pasay City. (via Gina Pleñago)

Muling nakasamsam ang Bureau of Customs-Ninoy Aquino International Airport (BOC-NAIA), sa koordinasyon ng Philippine Drug Enforcement Agency (PDEA) ng ilegal na droga mula sa dalawang abandonadong package sa OBC Warehouse, NAIA Complex, Pasay City.

Ang mga package na parehong idineklarang CCTV kits, ay isinailalim sa beripikasyon at masusing sinuri kung saan nadiskubre na naglalaman ng hinihinalang shabu na may halagang aabot sa P22,997,600.

Ayon sa Customs, ang unang package ay nagmula sa Malawi, Africa, na naglalaman ng 2,370 gramo ng shabu na may tinatayang halaga na P16,116,000.

Habang ang ikalawang package ay nagmula naman sa Johannesburg, South Africa, na naglalaman ng 1,012 gramo ng umano'y shabu na may halaga na P6,881,600.

Ang mga ilegal na droga ay pormal na itinurn-over sa PDEA para sa kaukulang kustodiya, pagtatapon, at karagdagang imbestigasyon.

Binigyang-diin ni NAIA BOC District Collector Atty. Maria Yasmin O. Mapa, na mas pinalalakas ang pagbabantay sa mga paliparan at warehouse, katuwang ang iba pang law enforcement agencies upang mapigilan ang drug smuggling networks sa mga paliparan sa bansa.

P130M droga, nasabat

ni Eli San Miguel - Trainee @News | January 22, 2024

Nasabat ng pulisya ang higit sa P130 milyon halaga ng ilegal na droga sa unang tatlong linggo ng Enero, ayon sa ulat ng Philippine National Police (PNP) ngayong Lunes.

Sinabi ni PNP chief Gen. Benjamin Acorda Jr. na nakahuli ang pambansang puwersa ng pulisya ng 1,661 mga indibidwal na may dala ng halos P132.9 milyon halaga ng ilegal na droga mula Enero 1 hanggang Enero 18 ng taong ito.

“The PNP conducted a total of 1,376 anti-illegal drugs operations. These operations resulted in the arrest of 1,661 drug personalities and the confiscation of an estimated standard drug price of P132.9 million,” pahayag ni Acorda sa mga reporters sa isang press briefing.