P23M shabu sa mga CCTV, naharang sa NAIA

ni Gina Pleñago @News | February 20, 2026

Photo: Ang mga umano'y shabu na inilagay sa loob ng lalagyan ng idineklarang CCTV kits  sa OBC warehouse sa NAIA Complex Pasay City. (via Gina Pleñago)

Muling nakasamsam ang Bureau of Customs-Ninoy Aquino International Airport (BOC-NAIA), sa koordinasyon ng Philippine Drug Enforcement Agency (PDEA) ng ilegal na droga mula sa dalawang abandonadong package sa OBC Warehouse, NAIA Complex, Pasay City.

Ang mga package na parehong idineklarang CCTV kits, ay isinailalim sa beripikasyon at masusing sinuri kung saan nadiskubre na naglalaman ng hinihinalang shabu na may halagang aabot sa P22,997,600.

Ayon sa Customs, ang unang package ay nagmula sa Malawi, Africa, na naglalaman ng 2,370 gramo ng shabu na may tinatayang halaga na P16,116,000.

Habang ang ikalawang package ay nagmula naman sa Johannesburg, South Africa, na naglalaman ng 1,012 gramo ng umano'y shabu na may halaga na P6,881,600.

Ang mga ilegal na droga ay pormal na itinurn-over sa PDEA para sa kaukulang kustodiya, pagtatapon, at karagdagang imbestigasyon.

Binigyang-diin ni NAIA BOC District Collector Atty. Maria Yasmin O. Mapa, na mas pinalalakas ang pagbabantay sa mga paliparan at warehouse, katuwang ang iba pang law enforcement agencies upang mapigilan ang drug smuggling networks sa mga paliparan sa bansa.

P11.7M drugs, buking sa parcel

ni Gina Pleñago @News | February 10, 2026

Photo: Inabandonang parcel na naglalaman ng ilegal na droga, nadiskubre sa isang warehouse sa Central Mail Exchange Center sa domestic road sa Pasay. (Bulgar via Gina Pleñago)

Apat na inabandonang parcel na naglalaman ng illegal drugs ang nadiskubre sa isang warehouse sa Central Mail Exchange Center sa domestic road sa Pasay City.

Sa inisyal na pagsisiyasat, natuklasan ang mga drugs sa regular cargo x-ray screening procedure kung saan nakita ang kakaibang imahe.

Isinagawa ang physical examination sa apat na parcel na idineklarang candies, clothing, comforters, cereals, snack packs, at tin containers. Dito nadiskubre ang 7,840 gramo ng high grade marijuana o Kush na may street value na aabot sa P11,760,000.

P1.7-M 'shabu' nakumpiska sa buy-bust sa Silang

ni Eli San Miguel - Trainee @News | November 7, 2023

Arestado ang dalawang drug suspect sa isang buy-bust operation sa Silang, ngayong Martes ng umaga.

Kinilala ng Cavite Police Provincial Office ang mga suspek bilang si alias Susan at alias Joshua.

Naaresto ang mga suspek matapos silang mahuli sa aktong pagbebenta ng ilegal na droga sa isang poseur buyer ng pulisya.

Nasamsam sa operasyon ang 255 gramo ng hinihinalang "shabu" na may tinatayang halagang P1,759,500.

Kasalukuyang nasa kustodiya ng Silang Municipal Police Station ang mga suspek at kinakaharap ang mga alegasyon ng paglabag sa mga batas laban sa droga.

Ilalabas ang mga kumpiskadong ebidensya sa Cavite Provincial Forensic Unit sa Imus City.