Yulo, silver-bronze sa vault at parallel bars sa FIG WAGC

ni Gerard Arce - @Sports | November 8, 2022

Nakuntento lang sa magkahiwalay na silver at bronze medals si two-time World gymnastics champion Carlos Edriel “Caloy” Yulo sa nagdaang 51st FIG World Artistic Gymnastics Championships sa idinedepensang vault event at parallel bars sa Liverpool, Great Britain noong Linggo ng gabi (oras sa Pilipinas).

Tumapos lang ang 2021 vault champion sa Japan sa iskor na 14.950, matapos daigin ni Artur Davtyan ng Armenia na nakakuha ng mas mataas na puntos na 15.050 para sa gintong medalya. Napunta ang bronze medal kay Igor Radivilov sa 14.733 ng Ukraine.

Lumapag sa 3rd place ang 22-anyos sa parallel bars sa 15.366 points sa final event matapos mapagwagian ni Zou Jingyuan ng China ang titulo mula sa impresibong 16.166, habang silver si Lukas Dauser ng Germany sa 15.500. Noong 2021 ay second place ito sa Japan.

Minsan na ring nagkampeon ang multi-gold medalists sa SEAG sa paboritong floor exercises noong 2019 Stuttgart meet. Subalit nabigo sa medalya sa nasabing event, kabilang ang individual All-around sa 8th place at 7th sa floor exercise. “My first vault is not ready yet. It was a great challenge for me, and great preparation for next year.

I’m really happy that I made it, even though it’s not gold in the end, it’s (still) silver,” wika ni Yulo, na tumapos na 4th place sa 2020+1 Tokyo Olympics sa vault event.

“It’s really different when you get gold, but it is what it is, and I accepted that,” dagdag nito na nalungkot sa nakuhang runner-up finish.

Lumipad na nitong Lunes pabalik ng Japan ang grupo ni Yulo kasama si Japanese coach Munehiro Kugiyama at physiotherapists Junpei Kono.