Yulo, gold at silver sa FIG World C'ships

ni Gerard Arce - @Sports | October 25, 2021

Pinatunayan ng Filipino top-gymnast na si Carlos Edriel "Caloy" Yulo na siya pa rin ang hari men’s vault event para sa gold medal at nasundan pa ng pagsungkit ng silver medal sa men’s parallel bars, kahapon sa 50th FIG Artistic Gymnastics World Championships sa Kitakyushu, Japan.

Pinagtagumpayan ng 21-anyos ang final round sa bisa ng 14.916 kasunod ng 5.600 difficulty at 9.200 execution sa 14.800 sa unang attempt triple twist routine kasunod ng perpektong two flips at twist para sa 5.600 difficulty at 9.433 na execution para sa 15.033 sa second attempt para magkampeon.

Nasundan agad ito ng silver medal sa Parallel Bars sa iskor na 15.300 (6.400 difficulty, 8.900 execution). Napanalunan ng 24-anyos na Chinese na si Hu Xuwei ang titulo sa bisa ng 15.466 (6.600 diff., 8.866 exec), habang napunta ang bronze medal sa teammate nitong si Shi Cong sa 15.066.

Sumegunda kay Yulo para sa silver medal sa men’s vault si hometown bet Hidenobu Yonekura (14.866) mula sa 15.000 sa first attempt (6.000 diff, 9.000 exec.) at 14.733 (5.600 diff., 9.133exec.) sa 2nd attempt. Bronze medal si Andrey Medbedev ng Israel (14.649) mula sa 14.533 (5.600 diff., 8.933 exec.)

Nakabawi ang 2019 Stuttgart World titlist sa kabiguang madepensahan ang paboritong Floor Exercise event na nagtapos sa 5th place noong Sabado ng hapon matapos higitan ang third place finish sa qualifying (14.808) para kunin ang kauna-unahang titulo. Nitong nagdaang 2021 All-Japan Senior and Master’s Gymnastics Championships sa Yamagata, Japan noong Setyembre ay tumapos ang biennial meet multi-medalist sa 3rd place sa men’s vault event sa 15.000.