Young Azkals ang babanat sa AFC U-23 Qualifying

ni Anthony E. Servinio - @Sports | October 23, 2021

Karamihan ng mga kasapi ng Azkals Development Team (ADT) ng Philippines Football League (PFL) ang bubuo ng kinatawan ng Pilipinas sa qualifiers para sa 2022 AFC Under-23 Asian Cup Uzbekistan. Haharapin ng Young Azkals simula Oktubre 25 ang mga pambato ng defending champion Timog Korea, Timor Leste at punong abala Singapore sa Grupo H upang makapasok sa torneo sa unang pagkakataon.

Pangungunahan ang koponan ng mga midfielder na sina Oliver Bias at Mark Winhoffer at goalkeeper Quincy Kammeraad ng ADT at defender Justin Baas ng PFL champion United City FC na mga naglaro na para sa Senior Azkals sa FIFA World Cup 2022 Qatar Qualifiers noong Hunyo sa U.A.E.

Ang iba pang ADT na napili ay sina forward Marcel Ivan Ouano at mga midfielder Jethro Borlongan, Dennis Chung, Yrick Gallantes, Mandy Lloyd Ignacio, Oskari Johannes Kekkonen, Sandro Miguel Reyes at Mark Francis Swanston at defender Christian Rontini.

Sina Baas, Chung, Gallantes at Rontini ay mga beterano ng 2019 SEA Games. Kinuha rin mula sa PFL sina forward Kieran Hayes ng United City at goalkeeper Jessie Reil Semblante ng Mendiola 1991 FC.

Tanging si goalkeeper Enrico Mangaoang ang naglalaro para sa De La Salle University sa UAAP. Walang koponan sa ngayon sina midfielder Nathan Rilloraza at forward Miguel Antonio Mendoza.

Ang magiging kampeon ng grupo ay tutuloy sa Uzbekistan. Kasalukuyang tinatapos ng Young Azkals ang kanilang ensayo sa Qatar. Bago noon, nag-ensayo ang koponan sa isang bubble sa Aboitiz Pitch ng Lipa City, Batangas na may basbas ng Philippine Sports Commission at sumasang-ayon sa Joint Administrative Order 2021-0002 ng PSC, Department of Health (DOH) at Games and Amusements Board (GAB) noong Setyembre.