World Volleyball out sa Russia, Ukrainian Boxer, nagsundalo

ni MC - @Sports | March 3, 2022

Inalis na rin sa Russia ang karapatan na mag-host ng men's Volleyball World Championships sa Agosto at Setyembre dahil na rin sa patuloy na pag-atake ng bansa sa Ukraine, ayon sa anunsiyo ng governing body ng International Volleyball Federation (FIVB) noong Martes.

Ang championships ang pinakahuling major sporting event na tinanggal sa Russia mula nang ilunsad ni President Vladimir Putin ang pagkubkob noong Huwebes.

"Following Russia's military invasion of Ukraine, the FIVB remains gravely concerned by the escalating situation and for the safety of the people of Ukraine," ayon sa International Volleyball Federation sa isang statement.

Sa konklusyon ng FIVB Board of Administration, imposibleng makapaghanda at makapagdaos ng World Championships sa Russia gawa ng pakikidigma sa Ukraine. "It has accordingly decided to remove from Russia the organization of the FIVB Volleyball Men's World Championship scheduled to be held in August and September 2022."

Ang pasya ng federation ay kasunod ng anunsiyo ng European football governing body na UEFA noong Biyernes na ilipat na lang sa Mayo 28 sa Stade de France sa Paris ang final ng The Champions League, ang premier club competition mula sa The Gazprom Arena sa Saint Petersburg. Kinansela rin noong Biyernes ng Formula One ang Russian Grand Prix na nakaiskedyul sana sa Set. 25.

Samantala, lumahok na rin si boxer Vasiliy Lomachenko, ang two-time Olympic gold medalist sa defense battalion ng Ukraine sa gitna ng pag-atake ng Russia, ayon sa ulat ng ESPN.

Sa FB page ng 34-anyos na si Lomachenko, nakasuot na ito ng military gear. Nasa Greece si Lomachenko nang magsimula ang pagkubkob at ang kanyang pag-uwi noong Biyernes sa Ukraine ay nabalahaw pa dahil sa air traffic grounded. Bumaba ang flight ng world champion na may three weight classes (featherweight, junior featherweight and lightweight) sa Bucharest, bumiyahe patungo ng Romania noong Sabado upang makauwi sa Odessa.

Tulad niya, si Kyiv mayor Vitali Klitschko at kapatid na si Wladimir– kapwa heavyweight champions at Hall of Famers ay dinedepensahan ngayon ang Ukraine laban sa Russia.

Si Lomachenko ay may 16-2 record at 11 knockouts. Ang susunod niyang laban ay sa Hunyo 5 sa Melbourne, Australia laban kay Australian lightweight champion George Kambosos.