ni Gerard Arce - @Sports | October 13, 2020
Pinatunayan ni Karateka James De Los Santos na karapat-dapat siya sa taguring “The Pandemic Online World Champion” matapos tuluyang kunin ang No.1 spot sa World ranking kasunod ng kambal na kampeonato sa gitna ng nararanasang krisis ng mundo dulot ng novel coronavirus disease (Covid-19) pandemic.
Matapos ang 7 buwan na pakikipaglaban para sa inaasam na numero-unong posisyon sa pandaigdigang kumpetisyon ay nakamit rin ng dating National team karateka ang No. 1 spot sa pamamagitan ng kampeonato sa 1st Euro Grand Prix Tournament at E-Karate Games 2020 na kanyang ika-14th at 15th titulo ngayong taon.
Nag-aantay na lamang na mabago ang estado sa World rankings ng 2017 Southeast Asian Games Kuala Lumpur, Malaysia bronze medalist bago opisyal na ianunsyo ang pagkakakopo nito sa unahang pwesto.
“I didn’t realize that time has flown by so fast, and now I’m the no. 1. But it doesn’t stop there. I have a much bigger goal now: to maintain the no. 1 spot throughout the year. I know there will be others out there that want it, so that will keep me working hard,” pahayag ni De Los Santos sa panayam ng Bulgar Sports sa online messages.
“It’s been seven months since I started playing in virtual tournaments. When I became the no. 2 back in August 6, I saw that I was nearly 3000 points behind no. 1. I was discouraged at first, but my kata coach, Masa Saito, reminded me to have patience; take it one tournament at a time. That gave me more motivation to work harder,” dagdag nito, na nagsimulang lumahok sa mga virtual competition sapol ng magsimula ang pandemya noong Marso sa buong mundo, kung saan kinokonsidera umano nito na magiging mas mapaghamon ang online events kumpara sa regular na kumpetisyon dahil mas matututukan umano ng mga hurado ang ginagawang performance ng bawat kalahok.
Kung pagbabasehan ang kasalukuyang puntos na nakulekta ng 30-anyos na De La Salle University Accountancy graduate, mayroon na itong 8,110 points kontra s 8,575 points ni Eduardo Garcia ng Portugal. Gayunpaman, hindi pa naisasama rito ang 435 points sa Okinawa E-Tournament World Series #1 na kanyang napanalunan para sa ika-13th gold nito noong Biyernes ng umaga para lumapit sa 8,545; habang inaantay pang maisama ang isa pang 435 points mula sa 1st Euro GP ay malalagpasan na nito si Garcia sa 8,980 para lumamang ng 405 points.
“I would be around 345 or 405 points ahead. That was my goal, to become the number one E-Kata player in the World. I still can’t believe I was able to achieve it in a short amount of time,” saad ng International Shotokan Karate Federation member, na nag-aantay pa ng isa pang resulta kalaban si Moreno Domont ng Switzerland sa Golden League Karate E-Tournament, habang sinusulat ang balitang ito.
Naging daan ng dating 6th time Philippine National champion patungong No.1 sa world rankings ang panalo kina Kevin Petry ng Luxembourg sa quarterfinals, Matias Moreno Domont ng Switzerland sa semifinals at Silvio Cerone-Biagioni ng South Africa para sa 14th gold sa Euro grand prix, habang sinipa naman nito ang ika-15th sa pamamagitan ng mga panalo kina Jamie Parfitt ng Great Britain sa quarterfinals, Hossein Tani ng Iran sa semifinals at Nejc Sternisa ng Slovakia sa championship round sa E-Karate Games 2020.