WILLIE, SUKO NA 'DI KAYANG PATAKBUHIN ANG AMBS KAYA NAG-RESIGN

ni Erlinda Rapadas @Teka Nga | April 14, 2023

Sa kanyang pag-alis sa AllTV Network, tila nabunutan ng tinik at nawalan ng bigat na pasanin sa kanyang mga balikat si Willie Revillame.

Tinanggap niya sa sarili ang katotohanan na hindi kinaya ng kanyang powers ang pagpapatakbo sa Villar Network. Na-realize niyang hindi ganu'n kadali ang pagsisimula at pagbuo ng programming ng isang network at 3 hanggang 5 taon pa ang kailangan upang makapagsimula ang AMBS.

Maraming tao pa ang kakailanganin ng AllTV upang maging fully operational na ang network.

Hindi magician si Willie para agad-agad ay mabigyan ng mga magagandang shows ang AllTV.

Gaano man kalaki ang kagustuhan niya na makatulong sa AllTV ay hindi niya kakayanin. Hindi maiwasan na magkaroon ng sablay sa kanyang mga plano.

Hindi perpektong tao si Willie, nagkakamali rin siya sa mga desisyon niya sa buhay. Ang pagbibitiw niya sa AllTV ay hindi nangangahulugan na talunan siya at walang kakayahan.

Binigyan lang niya ang kanyang sarili ng kalayaan mula sa napakalaking responsibilidad na nakaatang sa kanyang mga balikat.

Ngayon nga ay makakatulog na nang mahimbing si Willie dahil wala na itong masyadong iniisip at puwede na ring maglibang-libang at mag-golf.