Wiggins, umiinit sa Warriors, Porter, umapoy sa Rockets

ni Anthony E. Servinio - @Sports | December 5, 2022

Unti-unting umaakyat ang World Champion Golden State Warriors at binigo ang bisitang Houston Rockets, 120-101, sa NBA kahapon mula sa Chase Center. Uminit sa tamang panahon ang shooting ni Andrew Wiggins at umakyat ang Warriors sa ika-anim na puwesto sa Western Conference.

Bumanat ng walong three-points si Wiggins patungo sa 36 puntos sa 34 minuto.

Walong tres din si Stephen Curry para sa 30 puntos habang 21 puntos si Jordan Poole buhat sa limang tres.

Nanguna sa Rockets si Kevin Porter Jr. na may 20 puntos at tig-13 puntos sina kabayan Jalen Green, Kenyon Martin Jr. at Tari Eason. Tumabla ang Houston sa San Antonio Spurs sa kartadang 6-17 sa pinakailalim ng West.

Humugot ng lakas ang Portland Trail Blazers ng 45 puntos mula kay Anfernee Simon at 33 kay Jerami Grant upang iligpit ang Utah Jazz, 116-111. Nasayang ang laro ni Pinoy pride Jordan Clarkson na nanguna sa Jazz na may 24 puntos.

Bumawi ng panalo ang Milwaukee Bucks sa Charlotte Hornets, 105-96, sa likod ni Bobby Portis na may 20 puntos at Jordan Nwora na may 17 puntos. Isang araw matapos bumalik sa aksiyon, lumiban si Khris Middleton kasabay nina Giannis Antetokounmpo at Jrue Holiday subalit nagtulungan ang mga nalalabing Bucks upang umangat sa 16-6 at lumapit sa numero unong Boston Celtics na 18-5.

Matapos isnabin para sa Player of the Month, ipinakita ni Luka Doncic na dapat sa kanyan iginawad ang karangalan at ibinuhat ang Dallas Mavericks laban sa New York Knicks, 121-100. Ipinasok ni Doncic ang 19 ng kanyang 30 puntos sa second half na may kasamang walong rebound at pitong assist.