Warriors ginulantang ang Lakers, tabla sa 1-1

ni Anthony E. Servinio @Sports | May 6, 2023

Mga laro ngayong Sabado

7:30 a.m. Boston sa Philadelphia

10:00 a.m. Denver sa Phoenix

Lumabas ang bangis ng World Champion Golden State Warriors at dinurog ang bisita Los Angeles Lakers, 127-100, at itabla ang kanilang 2023 NBA Western Conference Semifinals sa 1-1 kahapon sa Chase Center. Malupit na shooting sa three-points ang susi ng Warriors at nakabawi sa 112-117 talo sa Game One.

Bumanat ng apat na tres sa second quarter si Klay Thompson bahagi ng 43 puntos ng Golden State at ibinaligtad ang 33-26 lamang ng Lakers sa 67-56 pagsapit ng halftime. Hindi pa tapos si Thompson at bumuhos ng 11 puntos sa third quarter at lalong lumayo, 110-80.

Kahit hindi na naglaro sa fourth quarter, nanguna pa rin si Thompson sa kanyang 30 puntos mula sa walong tres sa 31 minuto. Sumunod si Stephen Curry na may 20 puntos at 12 assist.

Maagang sumuko ang Lakers at puro mga reserba na ang pinalaro sa fourth quarter bilang paghahanda sa Game 3 ngayong Linggo sa Crypto.com Arena. Nagtala ng 14 ng kanyang 23 puntos sa first quarter si LeBron James subalit umalat ang laro mula roon.

Samantala, napili ang mga pausbong na manlalarong sina Irus Chua at Keiffer Alas upang maging bahagi ng prestihiyosong NBA Academy Asia Development Camp ngayong Mayo 8 hanggang 11 sa Singapore. Ilan sa mga dumaan sa kampo ay tuluyang naging NBA player tulad nina Josh Giddey ng Oklahoma City Thunder, Benn Mathurin ng Indiana Pacers at Dyson Daniels ng New Orleans Pelicans o naging iskolar sa malaking pamantasan sa U.S.