Walang planong ikasal kay Joem… MERYLL: HINDI KASI SIYA SOBRANG IMPORTANT SA AMIN

ni Janiz Navida @Showbiz Special | October 12, 2025

Photo: Meryll Soriano - IG

Pagkatapos ng ilang dekada mula nang pasukin niya ang showbiz, ngayon lang nakapag-decide si Meryll Soriano na magpa-handle sa isang talent management at ‘yan ay sa CreaZion Studios Artists.

Sa ginanap na press conference ng CSA sa Midnight Dream Studio sa Glorietta 4 nu’ng Huwebes, isa lang si Merryll sa mga ipinakilalang roster of talents ng talent management.  

Kasama niya sa kuwadra sina Karlo Carranza, Esteban Mara, Aaron Maniego, Polo Laurel, Chico Alicaya, Brei, Gabby Padilla, Chai Fonacier, Pupa Dadivas, Jade Lopez, at Alex Agustin. 

Tinanong namin si Meryll kung bakit siya nag-decide na magpa-handle sa CSA at paliwanag ng magaling na aktres, bukod sa acting, gusto na rin niyang magawa ang dream niya 20 yrs. ago pa na maging direktor.

In fact, excited ngang ibinalita ni Meryll na may niluluto na silang project ng CSA, pero tikom pa ang bibig niya at ni ayaw magbigay ng clue kung sino ang dream niyang maging bida rito, although inamin niyang dream niyang makatrabaho ang kanyang tita, ang Diamond Star na si Maricel Soriano at ang long-time partner niyang si Joem Bascon.

And speaking of Joem, suportado naman daw ng magaling ding aktor ang pagbabalik-acting ni Meryll matapos ang ilang taong pamamahinga dahil sa pag-aalaga sa anak nilang si Gido na 5 yrs. old na ngayon. 

Alam naman daw kasi ni Joem ang “creative mind” ni Meryll at maging ang dream nga niyang magdirek kaya very supportive ito.

Natanong namin si Meryll kung may plano na ba silang magpakasal ni Joem, at aniya, “Ah, hindi kasi siya sobrang important sa amin kasi ang important sa amin, ‘yung relationship namin. But of course, napag-uusapan ‘yan kasi siyempre, ‘yung mommy niya… pero as in, hindi siya priority, kasi alam naman namin na ito na ‘yun, this is it pansit!”

Kinumusta rin namin kay Meryll ang tatay niyang si Willie Revillame na matagal nang hindi nagpapakita sa publiko, bagama’t may balitang magbabalik-TV na uli ito.

Kuwento niya, ‘pag may time, dinadalaw naman nila si Willie at tinutulungan niya ang ama sa mga personal businesses nito, and vice-versa, tinutulungan din siya ni Kuya Wil sa kanyang mga pangangailangan.

Isa sa mga dahilan kaya gustong magdirek ni Meryll ay para sa kanyang advocacy sa mental health.

Kaya tinanong namin kung paano niya tinulungan si Kuya Wil sa mental health nito nang hindi palaring manalong senador last elections?

Sagot ng aktres, “Du’n nga ako mabibilib sa papa ko kasi nu’ng tinext ko siya, the next day, magkasama kami, alam mo, he really puts things in perspective na ang bilis (maka-move on). And I think, nakita naman niya na it’s really to his advantage right now, so no regrets.

Dagdag pa niya, “Si Papa talaga, mabilis bumangon, eh. Mabibilib ka talaga.”

True bang nasaktan si Kuya Wil sa pagkatalo niya?

Pagkumpirma ni Meryll, “Nasaktan siya.”

Pero paglilinaw niya, hindi naman ito ikina-depressed ng ama. 

“Hindi ganu’n ang papa ko, eh. Nalungkot siya definitely pero mabilis talaga siyang bumangon. Mabibilib ka talaga. He’s very proactive.

“Nag-focus siya sa pagpapatayo ng kung anong meron siya. So, I’m happy na meron siyang ganu’n, ‘di ba? And you know, meron siyang enough wealth to be able to take a breather na you can rest before you venture out into something new. Pinagtrabahuhan niya ‘yan. Proud na proud nga ako sa kanya kung ano’ng meron siya ngayon, all hard-earned money. I’m very proud of him at sinabi ko rin sa kanya.”

Hindi ba niya isasama si Willie sa dream movie niya?

Natawa si Meryll at sumagot ng, “Naku, hindi! Hindi siya kasali ru’n. Wala siyang balak kasi.”

So, abangan na lang natin kung ano ang pasabog na dream directorial movie ni Meryll soon.