Walang face-to-face class hangga’t walang bakuna, period!

ni Ka Ambo - @Bistado | December 06, 2020

Malinaw ang pahayag ni P-Digong: Walang face-to-face class hangga’t walang bakuna.

Kung gayun, matatapos ang 2020-2021 school year nang naka-online lang!

◘◘◘

DAHIL online class, inirerekomenda na walang “failed” grade o awtomatikong “mas promotion” ang mga estudyante na nag-enroll.

Malaki ang tama ninyo!

◘◘◘

UMABOT na sa P10 trilyon ang utang ng Pilipinas.

Naka-prenda ang 110 milyong Pinoy!

◘◘◘

TEKA, kung isa kang pulubi, mayroon bang magpapautang sa iyo?

Wala!

◘◘◘

ANG utang ay hindi batayan kung mahirap o hindi ang tao.

Ang mga oligarko at kroni ay may multi-bilyong pisong utang din!

◘◘◘

ANG salapi o naabot na antas sa eskuwelahan ay hindi rin sukatan ng tagumpay.

Ang sukatan ng tagumpay ay batay sa “itinakdang personal na mithiin” ng indibidwal!

◘◘◘

ANG mapanghimasok na kapitbahay at sosyedad ay nangingilam sa pribadong buhay ng indibidwal.

Pinakikialaman nila kung tagumpay o hindi ang tao!

◘◘◘

GAYUNMAN, sa ilang nagmamasid, ang tagumpay ay kakambal ng “saya o pagiging kontento” ng tao sa kanyang buhay.

Ang magsasaka ay higit na mas masaya sa enhinyerong walang malinaw na direksiyon sa buhay!

◘◘◘

PERO, mahirap husgahan ang tao.

Dahil kahit sa paningin ng sosyedad ay bigo siya sa ordinaryong panukat, maaaring higit siyang masaya kaysa sa mga tsimosa’t tsismoso!