VP Leni at Mayor Isko, magta-tandem sa 2022?!

ni Ka Ambo - @Bistado | July 01, 2021

Umabot na ang sulfur dioxide sa NCR Plus na ibinubuga ng Bulkang Taal ng Batangas.

‘Yan ang “second wave”!

◘◘◘

GUMAWAK na nang todo ang biyak sa PDP-Laban.

Hindi na ito maiiwasan!

◘◘◘

MALINAW na kakandidato nang pangulo si Sen. Manny Pacquiao.

May karibal na si Mayor Sara sa hanay ng “orihinal na administration bet”!

◘◘◘

SA ngayon, diretso lang ang preparasyon ng mga maka-Duterte, ‘ere naman si Pacquiao, diretso lang din sa pagpaparamdam.

Lumalaki ang tsansa na sumabak na rin si VP Leni.

Ito ay dahil sa pagkakahati ng mga dating maka-Duterte!

◘◘◘

NAKITANG magkasama sina VP Leni at Mayor Isko.

Sila ba ang magta-tandem sa 2022?

Super-lakas niyan!

◘◘◘

PAPAYAG ba si Isko na pang bise-presidente lang?

No way!

◘◘◘

KUNG aastang “king maker” si VP Leni at susuportahan si Yorme—lalong lalakas ang oposisyon.

Kumbaga, tabla-tabla ‘yan!

◘◘◘

KUNG titigas ang ulo si Pacquiao at magpumilit na kumandidato, tatlo na ngayon ang malalakas na presidentiables.

Ito ay sina Mayor Sara, Pacquiao o sinuman kina Isko at Robredo!

◘◘◘

MAY nambubuyo naman kina Sen. Panfilo “Ping” Lacson at Senate President Vicente “Tito” Sotto III na mag-tandem din.

Kapag sumali ang dalawa, royal rumble na ulit ang 2022!

◘◘◘

SAKALING sumporta na lang ang dalawang senador at kumandidato na lamang na bise ni Yorme si Lacson—lalong sobrang lalakas ang oposisyon.

Ibig sabihin, solidung-solido ang Moreno-Lacson.

Mahirap nang banggain ‘yan!

◘◘◘

SA kabilang panig, hindi malinaw kung sino ang ita-tandem ni Mayor Sara.

Hindi rin malinaw kung sino ang pa-partner kay Pacquiao.

Kapag naunang nabuo ang Moreno-Lacson, maaga silang makakabuo ng ticket!

◘◘◘

PERO, paano naman si ex-Speaker Alan Peter Cayetano?

Saaan siya susuling?

Puwede siyang makipag-deal kay Pacquiao at isanib ang kanyang BTS sa break-away faction ng PDP-Laban ni Pacquiao!

◘◘◘

PAREHONG dating maka-Duterte sina Pacquiao at Cayetano kaya’t iisang balahibo ito.

Malaking gawak sa Duterte group ang pagkawala nina Pacquiao at Cayetano!

◘◘◘

SA ganyan postura, lalong lalakas ang loob ng oposisyon kung saan, puwedeng mabuong bigla ang United Opposition gamit ang koalisyon.

Kung sakali, biglang hihina ang kampo ni P-Duterte na magmimistulang mauulit ang sinapit ng kampo ni dating Pangulong Gloria Macapagal Arroyo.

Kahit nasa Malacañang, nabigong maipanalo nila ang kandidato nang administrasyon kontra kay ex-P-Noy!

◘◘◘

WALA kasing solidong Partido si Mayor Sara.

Taliwas dito, solido ang Liberal Party sa oposisyon.

Mahalaga ang istrukturang political sa lahat ng eleksiyon!