ni Mylene Alfonso @News | August 30, 2023
Naniniwala si Senadora Imee Marcos na magsasamantala ang mga negosyante sa unang linggo ng pagbubukas ng klase lalo na’t magkukumahog ang mga estudyante at mga guro na kumpletuhin ang kanilang mga gamit pang-eskwela.
Dahil dito, hinikayat ni Marcos ang Department of Trade and Industry (DTI) na paigtingin pa ang mga biglaang inspeksyon sa mga nagtitinda ng school supplies na lumalabag sa bagong-presyong gabay nito na isang buwan pa lamang ang nakalilipas.
“Iniisnab ng mga tindera ang price guide ng DTI," wika ni Marcos kaugnay sa 'Gabay sa Pamimili ng School Supplies sa 2023' ng kagawaran.
Sa isinagawang pagmo-monitor ng opisina ng senador sa presyo ng school supplies sa ilang palengke sa Metro Manila noong weekend at Lunes, ang mga notebook ay nagkakahalaga ng P23 hanggang P60 bawat isa, o hanggang P8 higit pa kaysa sa P23-P52 na nakalista sa gabay-presyo ng DTI.
Mas mura ang pad paper ayon sa gabay-presyo ng DTI, na nagkakahalaga ng P20-P28, pero umabot ng P35 lalung-lalo na sa mga palengke sa Caloocan at Rizal.
Ang mga krayola na iba't ibang dami ay nagkakahalaga ng P30-P100 kada lalagyan, samantalang sa gabay-presyo ng DTI ay P24-P69 lamang.
Gayunman, mas mababang presyo, tulad ng iba't ibang lapis at ballpen, ay mabibili sa P7-P11, kumpara sa listahan ng DTI na nagkakahalaga ng P11-P17.
Ang mga naghahanap ng mura sa Divisoria na bumibili nang maramihan ay makakakita na ang regular na mga notebook na dati'y nagkakahalaga ng P180-P200 kada ream, ngayon ay P250, samantalang ang spiral na mga notebook na dati'y nagkakahalaga ng P180-P220 kada ream ay nagkakahalaga ng hanggang P300.
Pinuri naman ni Marcos ang DTI sa mga biglaang inspeksyon nito sa Divisoria at iba pang palengke sa nakaraang dalawang linggo ngunit sinabi na pagkatapos ng inspeksyon, muling nagtaasan ang mga presyo.