Unti-unting pagluwag ng quarantine restrictions, mas oks sa M. Mla mayors

ni Ryan Sison - @Boses | October 21, 2020

Sa halip na isailalim sa Modified General Community Quarantine (MGCQ) ang Metro Manila, inirekomenda ng mga alkalde na palawigin muna ang General Community Quarantine (GCQ) hanggang Disyembre ngayong taon.

Dahil sa banta ng COVID-19, ayaw din nilang pabuksan ang mga sinehan, concert at Christmas parties sa mga pribadong sektor.

Kasabay nito ang pagbawas sa oras ng curfew sa Metro Manila na gagawin nang alas-12:00 ng hatinggabi hanggang alas-4:00 ng madaling-araw.

Habang nasa GCQ pa ang NCR, dapat munang paigtingin ang mga hakbang kontra COVID-19.

Dahil mas marami nang pinapayagang lumabas, mas malaki ang tsansa na magkahawaan.

Kaya pakiusap sa publiko, tiyaking nasusunod ang minimum health protocols sa lahat ng oras.

Kapag nasa pampublikong lugar, magkusa nang dumistansiya at isuot nang tama ang facemask, gayundin ang face shield.

Bukod pa rito, maging tapat sa pagsagot ng health declaration forms, at ‘pag wala sa kondisyon ang katawan, ‘wag na lang lumabas.

Ang pananatili ng quarantine restriction ay paalala na may virus pa rin sa paligid.

Bagama’t mas marami nang pinapayagang lumabas, hindi naman ibig sabihin nito na makakampante tayo.

Ibig sabihin din, magpa-Pasko at Bagong Taon tayong naka-quarantine. Pass muna sa party-party para iwas-hawaan.

Ibang-iba man sa ating nakasanayan, ‘ika nga, sakripisyo muna para sa ikabubuti ng nakararami.

Suportahan natin ang mga hakbang ng lokal na pamahalaan at tiyak na sama-sama nating malalabanan ang virus na ito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com