UCFC, naka-unang panalo; FEU at UP umiskor sa PFF Women's Cup

ni Anthony E. Servinio - @Sports | November 8, 2022

Naukit ng defending champion United City FC ang 1-0 tagumpay sa bisitang Stallion Laguna FC at makamit ang pinakaunang panalo sa kanilang bagong tahanan na New Clark City Stadium sa pagpapatuloy ng 2022-2023 Philippines Football League (PFL) hatid ng Qatar Airways noong Sabado. Hindi nagpahuli ang Azkals Development Team at naitala ang 3-1 tagumpay sa Mendiola FC 1991 sa Imus Grandstand noong Linggo.

Sapat ang maagang goal ni Kenshiro Daniels sa ika-19 minuto para sa United City.

Nahanap ni Hikaru Minegishi ang walang bantay na si Daniels na agad nagbigay ng malakas na sipa na hindi naharang ni Stallion goalkeeper Hayeson Pepito.

Nanatiling numero uno ang Kaya FC Iloilo na may 27 puntos subalit lumapit na ang United City na may 24 puntos. Pangatlo pa rin ang Dynamic Herb Cebu (21) at sinusundan ng Stallion (15), Azkals (12), Mendiola (3) at Maharlika Manila FC (1).

Samantala, nagsimula na rin ang 2022 PFF Women’s Cup noong weekend sa PFF National Training Center sa Carmona, Cavite. Sa unang laro ay dinurog ng University of the Philippines ang Azzuri, 8-0, at sinundan ng 2-0 paggulat ng Far Eastern University sa Kaya FC Iloilo. Sa ibang mga laro, sumama sa mga maagang nanalo ang Ateneo de Manila University laban sa Stallion Laguna FC, 4-1.