UCBL, hindi lang UAAP at NCAA, babantayan ang kalusugan

ni Anthony Servinio - @Sports | September 10, 2020

Nagalak ang mga liga ng kolehiyo matapos ihayag noong isang araw na papayagang muli mag-ensayo ang kanilang mga atletang mag-aaral. Magbubuo muna ng isang Technical Working Group at ang kanilang mga mabubuong patakaran ay ibabahagi sa mas malaking grupo na may kinatawan ang lahat ng mga liga sa loob ng susunod na dalawa o tatlong linggo.

Maliban sa dalawang higanteng liga ng NCAA at UAAP, binabantayan ang mga pangyayari ng mga liga gaya ng Universities and Colleges Basketball League (UCBL). Nais din ng UCBL na mairaos ang kanilang ika-limang taon sa kasalukuyang academic year.

Inamin ng Presidente ng UCBL na si Franklin Evidente na nag-usap agad silang mga opisyal ng liga matapos ihayag noong Lunes ang desisyon. Subalit marami silang tanong na maaaring masagot oras na mabalangkas ng TWG ang mga patakaran sa kalusugan lalo na sa pagbalik ng ensayo upang maiwasan na magkahawahan sa COVID-19.

Pangunahin sa binabalak ng UCBL ang pagpapatupad ng swab test para sa lahat bago payagan mag-ensayo. Tinitingnan din kung ilang beses susuriin ang isang indibidwal dahil hindi biro ang halaga ng isang pagsusuri na umaabot hanggang P3,000. “Nasa mga paaralan na ang huling desisyon kung papayagan nila mag-ensayo ang kanilang mga mag-aaral,” wika ni Evidente sa panayam sa BULGAR Sports. “Hindi natin sila masisi at ayaw nilang sumugal at magkahawahan.”

Matagumpay na tinapos ng UCBL ang kanilang ika-apat na taon noong nakaraang Nobyembre kung saan nakamit ng Diliman College Blue Dragons ang kanilang ikalawang sunod na kampeonato. Ang iba pang kasapi ng UCBL ay ang Centro Escolar University, Technological Institute of the Philippines, National College of Business and Arts, Philippine Christian University-Dasmarinas, Lyceum of the Philippines University-Batangas at University of Batangas.