TV host, sinabihang luma na ang atake... DAVID, UMAMING NAKASAGUTAN NA SI KORINA

ni Julie Bonifacio @Winner | July 22, 2023

For the first time ay nakatsikahan namin ang tsinitong aktor at modelo na si David Chua sa grand opening ng BBQ Chicken Restaurant sa Robinson’s Magnolia kamakailan.

Nandoon si David para i-cover ang grand opening ng BBQ Chicken resto na pagmamay-ari ni former Ilocos Sur Governor Chavit Singson para sa Rated Korina at Korina Interviews online hosted by Korina Sanchez.

Si David ang direktor ng The Rated K at dumalo rin sa grand opening ng BBQ Chicken Resto si Korina.

Akala namin nu’ng una ay endorser ng BBQ Chicken resto si David kasi mukha siyang Koreano.

Just in case ‘di n’yo pa alam, ang BBQ Chicken is a Korean restaurant na nai-feature sa sikat na K-drama na Crash Landing On You.

“Mukha lang tayong foreigner, pero ako’y Noyping-Noypi,” ngiting sabi ni David.

“Kasi ang aking ama ay isang Aleman, ‘yung ina ko naman ay Chinese. Dito ako lumaki, so proud tayo.

“Meron akong Filipino blood, kasi ‘yung mom ko ay half-Chinese, half-Filipino. Pero ang puso ko, Pinoy na Pinoy!”

Dahil first time namin siyang mainterbyu, we asked him tungkol sa rumor sa kanila ni Korina.

Natawa at first si David and then, nagkuwento ito kung paano siya naging close kay Korina.

“‘Yung mommy ko na yumao na ay kaibigan pala ni Ate Korina. Kasi nu’ng nasa hospital na, du’n dumating si Ate, so nalaman ko. Eh, nagkakasalubong kami sa ABS-CBN ni Ate dati, hindi naman kami nagbabatian kasi siyempre, ‘pag dumadaan siya, medyo lumalayo ako nang konti kasi kinakabahan ako sa kanya, eh. ‘Yun ang buong istorya nu’n.

“Ang tawag ko nga sa kanya, ‘Ina ng Laging Saklolo’ kasi sa bawat pagsubok na pagdaraanan natin ay lagi siyang nakagabay. Lagi siyang nandiyan, nakabantay lang sa likod at binibigyan tayo ng pagkakataon.

“Biruin n’yo, siya ang unang nagbigay sa akin ng puwesto na maging direktor. At ngayon, tinuturuan niya ako na mag-produce, kung papaano ‘yung mga numero, kahit na hirap tayo sa mga numero (laughs). Eh, inaaral ko ‘yan, dahan-dahan,” bulgar ni David.

Ibinahagi rin ni David sa amin ang working experience with Korina na knows sa showbiz ang mala-“urban legend” na kuwento sa kanya bilang “terror” na boss.

“Alam n’yo, may legendary na kasabihan na ‘pag siya raw ang boss mo, eh, nakakatakot. Pero kasi si Ate, perfectionist.

“So, tinuturuan ka niya na maging matibay, tinuturuan ka niyang maging mahusay. ‘Pag pinagalitan ka, hindi ‘yun dahil gusto ka niyang pagalitan, gusto niya na maging mahusay ka sa bawat larangan na gagawin mo.

“Ganyan si Ate. Hindi mawawala ‘yan kasi maski ako mismo, bilang isang direktor minsan, may gusto kang isang bagay na hindi makuha-kuha nu’ng idini-direct mo, nakakainit din naman ng ulo,” lahad niya.

Dinepensahan ni David si Korina sa ganitong attitude ng TV host.

Sabi niya, “Ang gusto lang niya, maging mahusay ka bilang isang… kung ano ka man.

Tinuturuan ka niya ng leksiyon, hindi dahil pinapagalitan ka.

“Gusto niya, mahulma ka para maging mas maayos kang nilalang, mas maayos kang tao.

‘Yung terror na ‘yan, eh, sino ba namang hindi magagalit sa paulit-ulit mong sinasabi, pero hindi pa rin makuha? Pero nakasanayan ko na ‘yan, eh. Naranasan ko.”

Inamin ni David na may mga pagkakataon din na nagka-clash sila ni Korina sa set.

“Nagkaroon na kami ng sagutan nu’ng isang beses dahil meron akong ideya na feeling ko ay mas millennial. Sabi ko, ‘Ate, mukhang medyo luma yata ang atake mo!’ Napalunok ako nu’ng sinabi ko ‘yun, eh. Sabi niya, ‘Ano ako, dinosaur?’ Sabi ko, ‘Hindi, siguro, ano lang, giraffe (laughs).’

“‘Pag ganu’n, ako na ‘yung tumatahimik kasi boss ko siya, eh. Respeto ‘yun na, oo nga naman, para marating niya ‘yung narating niya, dahil sa pinagdaanan niya. So, minsan, pinapayuhan niya ako, ‘Narating ko ito, hindi lang dahil sa kung ano’ng gusto kong sabihin.

Pinapayuhan kita kasi gusto kong marating mo ‘yung dapat mong marating, ‘yung pangarap mo,’” kuwento pa ni David Chua.