Tuloy na tuloy na ang laban sa 2022 eleksiyon

ni Ka Ambo - @Bistado | June 01, 2021

Nahahati na ang PDP-Laban.

Hindi sila takot sa “left hook”!

◘◘◘

KAPAG walang malinaw na ideolohiya ang Partido ay talagang mabilis itong mabalisawsawan.

Ibig sabihin ng balisawsaw ay hindi maluluto nang maayos ang kanin!

◘◘◘

SA pagluluto ng kanin, dapat may eksaktong tubig pero dapat ay “mainin” muna ito bago kainin.

Ang inin ay kasingkahulugan ng “nawnaw” o kumbaga sa malabong tubig, dapat mapasailalim muna ang burak at umibabaw ang malinaw na tubig at latak—bago ito mapakinabangan!

◘◘◘

NANG mawala si dating Senate President Nene Pimentel ay nalihis na o nawalan ng ideolohiya ang PDP-Laban.

Nagbalik ang PDP-Laban sa tradisyunal na political party o simpleng fly-by-night political party na nakasandal sa personalidad imbes na nakapundasyon sa ideolohiya o plataporma de-gobyerno!

◘◘◘

DAHIL traditional political party, ang organisasyon o liderato ng PDP-Laban ay nakasandal sa 2 personalidad sa kasalukuyan.

Isang paksiyon ay kontrolado ng amuyong ni P-Digong at ang ikalawang paksiyon ay nasandal sa tandem nina Pacquiao at ex-Senate President Koko Pimentel!

◘◘◘

SA orihinal na konsepto at pago-organisa ni Sen. Nene, bago tanggapin bilang miyembro ng PDP-Laban ay dapat sumailalim muna sa serye ng mga workshop-seminar-orientation.

Ito ay ang pagpapakilala o paglilinaw kung anong linya, mithiin, direksiyon o plataporma de-gobyerno ang paninindigan ng mga miyembro!

◘◘◘

SA malalim na ideolohiya, ikinonsepto ni Nene ang PDL-Laban pero dahil pumasok dito ang mga pusakal na pulitiko, nababoy ito nang todo.

Mula sa isang sampay-bakod na partido, bigla naghunos ang PDP-Laban nang gamitin ito ni P-Digong bilang pansalba sa teknikalidad sa pagkandidato noong 2016!

◘◘◘

KAHIT walang ideolohiya at hindi dumaan sa proseso, ipinagamit kay P-Digong ang PDP-Laban upang takasan ang rekisitos ng Comelec kung saan natapos na ang deadline sa pagsusumite ng COC.

Sa teknikalidad ng substitution, ginamit ni P-Digong sa “election document” ang PDP-Laban pero masuwerteng nagwagi!

◘◘◘

NAGKAROON ng kamandag ang PDP-Laban kung saan nagkaroon pa sila ng bonus nang sorpresang maging senate president si Sen. Koko kahit nagsosolo siyang “PDP-Laban” sa Senado.

Ngayon, pinag-aagawan ang titulo ng PDP-Laban sa gitna ng preparasyon sa 2022 election!

◘◘◘

NAPASUKAN ang PDP-Laban ng mga kapanalig ni P-Digong at nahalo ito sa grupo ni Pimentel.

Nauna dito, humiwalay na rin sa PDP-Laban ang dating secretary general na si dating Speaker Pantaleon Alvarez.

Kung susumahin, marami ring naging biyaya ang PDP-Laban kahit naglaho ang ideolohiya!

◘◘◘

SA ngayon, hindi malinaw kung saan patungo ang PDP-Laban.

Pero, ang kanyang hinaharap ay nakasandal sa dalawang personalidad—kay P-Digong at kay Pacquiao, pero hindi sa dapat sanay ay malinaw na ideolohiya ng pagbabago sa lipunan!