Online gambling, laganap dahil gobyerno mismo ang “sulsol”!

ni Ka Ambo @Bistado | February 25, 2026

Isinakdal na si Digong sa ICC.

Pero, hindi siya dumalo.

Dedma lang.

----$$$--

TINIRA ng abogado ni Duterte na si Nicolas Kauffman si PBBM.

Na-import ng The Netherlands ang maruming pulitika mula sa The Philippines.

----$$$--

NAGDA-DRAMA ang mga abogadong Pinoy sa The Hague.

Baka nahasa sila sa Plaza Miranda.

-----$$$---

BINANGGIT ang mga co-perpetrators ni Digong.

Nadawit ang dalawang aktibong senador.

Bidang-bida talaga ang Senado—pang-export ang kalidad!

----$$$--

SUMABIT ang hindi tinukoy na mataas na opisyal ng lalawigan ng Bulacan sa road rage sa NLEX.

Siguro naman alam n'yo na kung sino ang “bida” at “kontrabida.”

-----$$$--

ANG gobyerno ay isang malinaw na entablado ng mga pagtatanghal.

Puwede–kaso sino?

Puwede rin ang bold dancer.

He-he-he!

----$$$--

NATABUNAN ang flood control scam.

Nakapahinga si Boying nang bahagya.

-----$$$--

PERO, kahit si Boying ay may character role sa The Hague.

Mahaba pa ang teleseryeng ito.

May makokopya na naman ang “SIGABO.”

-----$$$--

BAGSAK ang ekonomiya.

Hopeless ang Bangko Sentral!

Baka magpa-imprenta na lang ng P2,000 bills.

-----$$$---

MAGTATAPOS na ang “FPJ’s Batang Quiapo.”

Hindi na ako makakapanood nang walang katapusang patayan kung saan ang bida ay “immortal.”

-----$$$--

PUWEDE bang mag-suggest ng “wakas” sa serye ng Batang Quiapo?

Parang awa n'yo na—total ending na, patayin  n'yo na si Tanggol!!

----$$$--

Marami na ang nalululong sa online gambling.

Ang gobyerno mismo ang “sulsol.”

-----$$$--

Pero, may nagsasabi, nag-ugat ang pagdarahop ng Pilipinas at posibleng pagkabangkarote nang palayasin ang “POGO”.

Nawala ang POGO, nawala rin ang sigla ng ekonomiya sa Metro Manila.

----$$$--

ISINISISI ang paglaganap ng krimen sa POGO, imbes sa pulisya.

Hampas sa langaw, latay sa kalabaw!!

Binaril si Juan, si Pedro ang namatay!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Hustisya sa biktima ng panggagahasa na sangkot ang konsehal, kailangang maibigay

ni Ka Ambo - @Bistado | October 13, 2021

Sa gitna ng COVID-19 crisis, may malaking problema si Gov. Danilo Suarez.

Nadadamay siya at ang kanyang anak sa isang kaso ng konsehal na sinisikap umano nilang maareglo.

◘◘◘

DAPAT hayaan na lang umandar sa normal na proseso ang kasong rape, illegal detention na isinampa sa isa niyang kaalyadong konsehal ng Lopez, Quezon.

Inihayag ng grupong Citizens Movement Against Corruption, Crime, Illegal Drugs and Gambling, Inc. sa pamumuno ni Prop. Salvador Singson-de Guzman na sinampahan ng mga kasong accessory to the crime of kidnapping and serious illegal detention with rape, obstruction of justice, accessory to the crime of child abuse at anti-graft and corrupt practices act si Quezon Governor Danilo Suarez at anak niyang abogado sa opisina ng Ombudsman.

◘◘◘

ANG kaso ng mag-ama ay isinampa sa Ombudsman noong Oktubre 7, ni Rose Rosario Tapiador, 53-anyos, tindera ng balut at nanay ng biktimang si Jennyrose na sinasabing kinidnap, ikinulong at ginahasa sa loob ng hotel ng isang konsehal sa Lopez, Quezon.

Sinabi sa affidavit-complaint ni Rosario na pilit umanong inaareglo ni Governor Suarez sa pamamagitan ng kanyang anak ang kasong kidnapping and serious illegal detention with rape at child abuse na isinampa ni Jennyrose sa konsehal.

◘◘◘

NAGANAP umano ang tangkang pag-areglo sa kaso ni Jennyrose noong Setyembre 25, kung saan pinuntahan ng anak ng gobernador ang mag-ina sa kanilang nirerentahang bahay sa Pasig City sa tulong ng isang Anamarie Santiago na pinsan ni Rosario.

Ayon sa sinumpaang salaysay ni Anamarie, bago niya sinamahan si Atty. Suarez sa bahay ng mag-ina ay ipinadukot muna siya sa tatlong lalaki noong madaling-araw ng Setyembre 22 bandang alas-2:00 ng madaling-araw.

◘◘◘

NATUTULOG umano siya sa loob ng bahay sa Malabon City kasama ang kinakasamang si Rodel.

Sinabi ni Anamarie na agad siyang isinakay sa kulay puting van at nakita niya sa loob ng sasakyan ang hipag na si Myrna na taga-Mauban, Quezon province at siya ang nagturo sa kinaroroonan niya.

Hindi niya nakausap ang hipag dahil pinagbawalan ng mga armado na magsalita.

◘◘◘

PAGDATING ng tatlong armado, kasama si Anamarie sa Kapitolyo ay wala pa si Governor Suarez kaya naghintay sila, subalit maghapon umanong hindi dumating ang gobernador.

Pinakain at pinatulog si Anamarie sa isang kuwarto sa Kapitolyo ng babae na hindi siya nagpakilala.

◘◘◘

DUMATING si Governor Suarez sa Kapitolyo noong araw ng Setyembre 24, kaya nagkausap na silang dalawa at pinakiusapan ng governor si Anamarie na tulungan niyang makalabas ng kulungan ang konsehal.

Sinabi ng gobernador kay Anamarie na samahan niya ang abogado sa bahay ng mag-inang Jennyrose at Rosario at pakiusapan silang makipag-areglo.

◘◘◘

AYON kay Prop. De Guzman ang pahayag ni Anamarie ay matibay na basehan upang idamay sa kaso si Gov. Suarez at ang kanyang anak dahil gusto nilang takpan ang mga kaso ng konsehal sa publiko.

Si Jennyrose ay sinasabing dinukot, ikinulong at paulit-ulit umanong ginahasa ng konsehal sa loob ng hotel sa Rosales, Pangasinan mula Abril 17 hanggang Abril 22.

◘◘◘

NOONG Setyembre 15, nagpalabas si Judge Rosely Andrada-Borja ng RTC Branch 53 sa Rosales, Pangasinan ng dalawang warrant of arrest laban sa konsehal na walang piyansa ang mga kaso.

Noong Setyembre 20, inaresto ang konsehal ng pinagsanib na puwersa ng CIDG at mga pulis ng Lopez and Catanauan Municipal Police Stations.

Marami ang nagdarasal na mabigyan ng hustisya ang biktima ng panggagahasa.

Binababoy ng mga opisyal ng gobyerno ang sagradong political exercise ng demokratikong gobyerno

ni Ka Ambo - @Bistado | October 10, 2021

Tapos na ang pagsusumite ng COC.

Pero, puwede pa ang substitution.

Hanggang Nob. 15 pa para mag-sirko!

◘◘◘

HANGGA’T hindi pa tapos ng substitution, hindi pa rin mapapanatag ang mga tao.

Sari-sari pa ring espekulasyon ang lilitaw.

'Yan ay dahil sa isang precedent na sinimulan ni P-Digong!

◘◘◘

ISA ring maselang isyu ang pagkandidato sa mas mababang posisyon ng mga opisyal na may term-limit sa kandidatura.

Tulad sa Mandaluyong, kumandidato bilang vice-mayor ang dating mayor at ikinandidato naman ang ama na may sobra-sobra nang edad!

◘◘◘

MAAARING magbitiw ang matandang kandidato sakaling magwaging mayor dahil sa katandaan o sakit.

Siyempre, uupong mayor naman sakaling magwaging vice-mayor ang dating mayor na sinagkaan ng term-limit.

'Yan ay isang butas na batas na dapat magkaroon ng malinaw na interpretation ang Korte Suprema.

Nababalewala ang intensiyon ng batas kaugnay ng term-limit!

◘◘◘

ISANG isyu rin na lumutang nang magdeklara si P-Digong na kakandidatong pangalawang pangulo pero bumaha ang kritiko at batikos.

Imbes na siya ang kumandidato, nagsumite ng COC ang kanyang alter-ego na si Bong Go bilang kandidatong vice-president!

◘◘◘

NASORPRESA naman ang lahat nang biglang mag-hain ng COC si Sen. Bato dela Rosa bilang kandidatong pangulo.

Naghihinala ang ilan na gagamitin ni Meyor Sara ang slot ninuman kina Dela Rosa at Go upang makatakbo bilang pangulo o pangalawang pangulo gamit ang inaabusong “substitution”!

◘◘◘

DAPAT irebyung mabuti ang batas kaugnay ng term-limit at batas sa substitution.

Dapat ding ipawalambisa ang batas na puwedeng kumandidato ang active elected official sa higher position—nang hindi magbibitiw at puwedeng bumalik sa puwesto sakaling magwagi.

Ang probisyong ito ay masyadong inaabuso kaya’t dumarami ang kandidato na walang intensiyong lumaban sa halalan, kundi para takasan lamang ang isang lehitimong proseso ng election process!

◘◘◘

BINABABOY mismo ng mga opisyal ng gobyerno ang sagradong political exercise na siyang pundasyon ng demokratikong gobyerno.

Kapag binababoy ang pundasyon, humihina mismo ang Republika.

Isang klase rin ito ng korupsiyon sa mataas na antas ng sustansiya ng batas.

Maunawaaan sana ito ng lahat!