Tropa ni Super Swerte, nagprotesta

ni Green Lantern - @Renda at Latigo | December 15, 2021

Umuusok ang balitaktakan sa social media tungkol sa pagkapanalo ni Sky Shot sa 2021 PHILRACOM-PCSO Presidential Gold Cup noong Linggo sa Metro Turf, Malvar, Batangas.

Ayon sa mga karerista ay ginulangan umano ng magka-kuwadrang Sky Shot at Boss Emong ang mahigpit nilang karibal na si Super Swerte.

Komento ng mga karerista ay naatrasado ang pagremate ni Super Swerte dahil sa pangsasalto ni jockey Fernando Raquel na siyang sumakay kay Boss Emong.

"Dapat pumarehas sila ng laban, walang kredibilidad ang panalo ni Sky Shot dahil ginarapal nilang ginulangan si Super Swerte, sa madaling salita dinaya," ngingit ni Lizandro Salvador, veteran karerista.

Inaasahang mas iinit pa ang usapin sa Presidential Gold Cup dahil naghain ng protesta ang horse owner na si Sandy Javier Jr. na nasaksihan nito kung paano pinagtulungan nina Boss Emong at Sky Shot ang kanyang pambatong si Super Swerte na ginabayan ni former former Philippine Sportswriters Association, Jockey-of-the-Year awardee Jessie Guce.

Marami ang hindi nakuntento sa ipinataw na parusang suspensiyon na 156 racing days sa hineteng si Raquel at kabayong Boss Emong kaya naman nais ni Javier na imbestigahan mabuti ang lahat ng sangkot kasama ang MMTCI stewards.

"Considering that the results have been tainted with doubt and scrutiny, the undersigned wishes that: 1. The race be invalidated; 2. The MMTCI stewards involved in the said race be questioned and/or removed condoning such illegal act; 3. The concerned horses and jockey who committed such violations be disqualified," nasa liham ng protesta na ipinadala ng grupo ni Javier sa PHILRACOM.

Nagpadala rin ng Letter-Protest si star jockey Guce, prinotesta nito ang ginawang pagbangga sa kanya ni Raquel sa karera dahilan upang maantala ang pagremate ni Super Swerte.

Dismayado ang karerista, hindi nila nagustuhan ang umano'y maruming taktika ng

magkakamping Boss Emong at Sky Shot.

"Nakita naman talaga sa video kung paano nilang pinagtulungang saltohin si Super Swerte kaya dapat hindi ibigay ang panalo kay Sky Shot," ani Renato Villahermosa, veteran karerista.

Maging ang trainer ni Super Swerte na si Ruben Tupaz ay naghain din ng protesta at nais din nitong mapawalang bisa ang pagkakapanalo ni Sky Shot. Sina Boss Emong at Sky Shot ay mga pambato ni horse owner Edward Diokno.