Trackster Fil-Am Cray, pakay ang slot sa Tokyo Olympics

ni MC - @Sports | April 21, 2021

Sasabak sa siyam na track and field competitions si Fi-American trackster Eric Cray sa layuning makasungkit ng slot sa 2021 Olympic Games sa Tokyo, Japan.

Ayon kay Cray, target nitong makakuha ng Olympic standard time na 48.90 segundo sa men’s 400-meter hurdles. Lalahok si Cray sa Don Kirby Tailwind Open sa Abril 22 sa New Mexico, Drake Relays sa Abril 24 sa Iowa at Texas Meet sa Abril 30 at target nitong maabot ang Olympic standard.

Huling sumabak si Cray sa kompetisyon sa 2021 Michael Johnson Invitational sa Clyde Hart Track and Field Stadium ng Baylor University sa Waco, Texas kung saan nakakuha ito ng bronze. Kumpiyansa naman si Cray na makapapasok ito sa 2021 Tokyo Olympics na nakatakda sa Hulyo 23 hanggang Agosto 8.

Kasalukuyang sumasabak ang tubong Olongapo City na si Cray sa matinding training upang mapaganda pa ang kanyang oras. Nais ni Cray na maging pang-walong Pinoy Olympic qualifier kasama nina weightlifter Hidilyn Diaz, gymnast Carlos Edriel Yulo, pole vaulter Ernest John Obiena at boxers Eumir Felix Marcial, Irish Magno, Nesthy Petecio at Carlo Paalam. Bukod kay Cray, umaasa rin si Fil-Am sprinter Kristina Knott na makapasok sa Olympics.