Tax deduction sa transportation utility operators

ni Atty. Persida Rueda-Acosta - @Magtanong Kay Attorney | September 17, 2022

Dear Chief Acosta,

Ako ay operator ng public utility vehicles (PUVs) na pampasaherong jeepneys at inaatasan ko ang aking jeepney drivers na magkaloob ng diskwento sa pamasahe ng mga estudyante. Nang ako ay nagtungo sa Bureau of Internal Revenue (BIR) at nagsabing nais kong gamitin bilang tax deduction ang nasabing bawas-diskwento sa pamasahe ng mga estudyante, sinabihan ako na hindi ko maaaring gawin iyon. Hindi ko ba talaga puwede gawin ito? - Marc

Dear Marc,

Ang sagot sa iyong katanungan ay matatagpuan sa Seksyon 7 ng Republic Act No. 11314, kilala bilang “Student Fare Discount Act”, na nagsaad na:

“Section 7. Tax Deduction. -The public transportation utility operator may claim as tax deduction the student fare discount herein granted based on the cost of the services rendered: Provided, That the cost of the discount shall be allowed as deduction from gross income for the same taxable year that the discount is granted: Provided, further, That the total amount of the tax deduction net of value-added tax, if applicable, shall be included in their gross sales receipts for tax purposes and shall be subject to proper documentation and to the provisions of the National Internal Revenue Code, as amended.”

Ayon sa nasabing probisyon ng batas, ipinagkakaloob sa mga tulad mo na operator ng mga public utility vehicles ang benepisyo na gamitin bilang tax deduction ang ibinigay na diskwento sa pamasahe ng mga estudyante na base rin sa gastos ng iyong serbisyo. Kailangan lamang ay sundin ang mga itinakda ng batas. Una na rito, maaari lamang gamiting tax deduction ang diswkento sa mismong taon na ito ay iginawad sa estudyante. Ibig sabihin, hindi ito pwedeng i-carry over o gamitin sa ibang taon. Pangalawa, dapat isama ang tax deduction sa gross income para sa taong iyon. Panghuli, kailangang magsumite ng karampatang dokumento at sundin ang mga nakasaad sa National Internal Revenue Code.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.