Sustento ng ama sa ibang bansa sa menor-de-edad na anak sa ‘Pinas

ni Atty. Persida Rueda-Acosta - @Magtanong Kay Attorney | July 19, 2022

Dear Chief Acosta,

Ako ay Pilipino na permanenteng nakatira sa ibang bansa. Ako ay may menor-de-edad na anak na nasa Pilipinas at ang aking asawa ay nanghihingi ng sustento para sa kanya. Mayroon pa ba akong obligasyon na magbigay ng sustento kahit hindi na ako nakatira sa Pilipinas? - Jael

Dear Jael,

Ang sagot sa iyong katanungan ay matatagpuan sa Article 15 ng Republic Act No. 386 o mas kilala sa tawag na “The New Civil Code of the Philippines”, kung saan nakasaad na:

Art. 15. Laws relating to family rights and duties, or to the status, condition and legal capacity of persons are binding upon citizens of the Philippines, even though living abroad. (Binigyang-diin)

Batay sa nabanggit na batas, ang mga batas ng Pilipinas na may kaugnayan sa mga karapatan at obligasyon pampamilya, tulad ng pagbibigay ng supporta, sakop ang mga Pilipino kahit na sila ay naninirahan sa ibang bansa.

Kaugnay nito, ang mga taong may obligasyon na suportahan ang isa’t isa ay nakasaad sa Article 195 ng Family Code of the Philippines:

“Article 195. Subject to the provisions of the succeeding articles, the following are obliged to support each other to the whole extent set forth in the preceding article:

1. The spouses;

2. Legitimate Parents and their illegitimate children ascendants and descendants;

3. Parents and their legitimate children and legitimate and illegitimate children of the latter;

4. and legitimate and illegitimate children of the latter;

5. Legitimate brothers and sisters, whether of the full or half blood.” (Binigyang-diin)

Samakatuwid, mayroon ka pa ring obligasyon na magbigay ng sustento para sa iyong menor-de-edad na anak kahit na ikaw ay permanenteng nakatira na sa ibang bansa alinsunod sa mga nabanggit na probisyon ng batas.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.