Suportado sa pagiging member ng LGBT… BUNSO NINA BING AT JANNO, INALOK NA NG KASAL NG LONG-TIME PARTNER
- BULGAR
- Aug 19, 2024
- 3 min read
ni Julie Bonifacio @Winner | August 19, 2024
Engaged na ang bunsong anak nina Bing Loyzaga at Janno Gibbs na si Gabriella sa long-time partner niyang si Marga Bermudez.
Nag-propose si Marga kay Gabs habang sila ay nasa skiing trip. Masayang bumati naman sa kanila ang ilan sa kanilang showbiz friends tulad nina Nadine Lustre, Solenn Heussaff, Georgina Wilson, Gabbi Garcia, Liz Uy, Andi Eigenmann at Leila Alcasid.
Naging inspirasyon ng LGBT+ community sina Gabs at Marga. Nabansagan man silang ‘Queer Couple’, pinatunayan naman nila kung gaano nila kamahal ang isa’t isa.
Very supportive naman sina Bing at Janno sa love life ng kanilang bunsong anak. Nakikita nilang masaya si Gabs sa kanyang relasyon, at hindi nila hahadlangan ang anumang plano nina Gabs at Marga sa kanilang future.
Well, tunay na masuwerte ang mga anak na suportado ng mga magulang ang kanilang choice sa magiging partner in life.
Hindi raw totoo ang umuugong na balita na tatlong buwan na lang ang itatagal sa ere ng game show na Wil To Win (WTW) ni Willie Revillame dahil mababa raw ang ratings at walang commercials na pumapasok.
Pero, mismong ang Media Quest ng TV5 ang nagsabi na walang katotohanan ang balitang ititigil na ang WTW. Maging si Willie ay hindi rin basta makakapayag na matigil ang kanyang show. Co-producer siya ng WTW, kaya ginagawa ni Willie ang lahat upang magustuhan ng mga viewers ang show.
Well, tatlong taon ang kontrata ng WTW sa TV5, at hindi naman ito basta ititigil dahil maraming viewers at patuloy na namamahagi ng malalaking premyo sa mga nananalo sa mga games.
Si Willie Revillame ang tipo ng tao na hindi basta-basta sumusuko sa laban. Mas nagsisilbing challenge sa kanya ang mga pagsubok na dumarating.
Hindi naman maitago ni Ogie Alcasid ang kanyang sama ng loob sa panganay na anak na si Leila dahil sa ginawa nitong pakikipag-live-in sa boyfriend na si Mito Fabie a.k.a. Curtismith.
Si Leila ay anak ni Ogie sa ex-wife niyang si Michelle Van Eimeren. Dinamdam ni Ogie ang desisyon ng anak na magsama na sa isang bubong. Ni hindi man lang daw ipinaalam ng mga ito ang kanilang plano na mag-live-in.
Ganunpaman, dahil pareho nang adult ang anak na si Leila at ang nobyo nito, tanggap na ni Ogie ang lahat. Sakali raw na magkaroon ng problema si Leila at gustong bumalik sa kanila ay tatanggapin pa rin niya.
Malungkot man na nawalay sa kanyang dalawang anak na sina Lorin at Venice, walang choice si Ruffa Gutierrez kundi masanay na hindi niya madalas kasama ang mga anak.
Parehong sa USA na mag-aaral sina Lorin at Venice. Sa Los Angeles, California nag-enroll si Lorin, at si Venice naman ay sa isang unibersidad sa Texas.
Hindi nga namalayan ni Ruffa ang mabilis na paglipas ng panahon. Talagang miss na miss niya ang kanyang mga anak, ngunit dapat na raw maging independent sa buhay ang mga ito.
Parehong matalino sina Lorin at Venice, kaya malaki ang tiwala ni Ruffa na makakapag-adjust sila sa buhay sa USA.
Samantala, marami namang pinagkakaabalahan dito sa Pilipinas si Ruffa upang hindi niya maramdaman ang lungkot at pangungulila sa mga anak.
Binilinan niya si Lorin na dalawin ang kapatid na si Venice sa Texas kapag may libreng oras. Nangako rin siyang madalas na tatawag sa mga anak upang alamin ang kanilang kalagayan.
Proud si Ruffa na gampanan ang kanyang tungkulin bilang isang single mom.
תגובות