Super Suwerte at Boss Emong target ang Pres.Gold Cup Crown

ni Green Lantern - @Renda at Latigo | December 09, 2021

Inaasahang bakbakang umaatikabo ang masisilayan sa Philippine Racing Commission-Philippine Charity Sweepstakes Office Presidential Gold Cup na ilalarga sa Linggo sa Metro Manila Turf Club, Malvar - Tanauan City, Batangas.

Puntirya ng mahigpit na magkaribal na sina Super Swerte at Boss Emong na makuha ang prestihiyosong korona sa event na may P10-M guaranteed prize. “Cream of the Crop ito,” saad ni PHILRACOM Chairman Aurelio "Reli" de Leon nang dumalo sa online forum kada Martes ng Philippine Sportswriters Association (PSA).

Sina Super Swerte na anak nina Art Moderne at Faster Tapper at Boss Emong na lahi nina Dance City out at Chica Una ay makakaharap ang defending champion na si Pangalusian Island sa distansyang 2,000 meter race.

Maliban kina Super Swerte at Boss Emong na pag-aari nina Sandy Javier at Edward Diokno ayon sa pagkakasunod at Pangalusian Island, ang ibang tigasing kalahok ay sina 1st at second leg Triple Crown ruler Nuclear Bomb at 3rd leg winner War Cannon.

Hahamigin ng magkakampeon ang P6-M, ang second placer ay P2-M habang tig-P1-M at P500,000 ang third at 4th placers.

Target na sumilo rin ng titulo sina Sky Shot, Gusto Mucho, Great Wall, Union Bell, Isla Puting Bato, Summer Romance, Prosperity, Obra Maestra at Stardust.

Tatanggap din ang 5th at 6th ng tig P300,000 at P200,000 habang mapupunta ang P500,000 sa breeder ng winning horse.

Ayon sa mga karerista, malaki ang tsansa ni Super Swerte na manalo sa big event dahil maganda ang ipinapakita nitong performance sa mga nakaraang takbo nito. "Tingin ko kaya ni Super Swerte na manalo ngayon kasi sigurado naman na naghahanda ang trainer at jockey niya," saad ni Jimmy Villahermosa, veteran karerista.

Rerendahan ni Jessie B Guce habang si class A at veteran jockey Fernando Raquel ang sasakay kay Boss Emong. Samantala, masisilayan din ng mga karerista ang labanan ng mahuhusay din na kabayo sa 2021 PHILRACOM "Imported Challenge Stakes Race A" kung saan ay walo ang magtatagisan ng bilis sa distansyang 1,600 meter race.