Super Spunky matibay sa 3-YO

ni Green Lantern @Renda at Latigo | August 16, 2023

Bumilib ang mga karerista sa tibay ni Super Spunky sa balikatang labanan matapos manalo sa 2023 PHILRACOM 3-Year-Old & Above Maiden Race na inilarga sa Metro Turf, Malvar - Tanauan City sa Batangas noong Linggo ng hapon.

Nasilayan ng mga karerista kung paano pinahirapan si Super Spunky bago nasilo ang panalo.

Paglabas ng aparato ay nagtagisan na agad ng bilis sa unahan sina Super Spunky at Don Pedro na umabot hanggang home stretch.

Patuloy ang bakbakan sa unahan ng dalawang kabayo at sa huling 150 metro ng karera sa rektahan ay umungos na si Super Spunky.

Nanalo si Super Spunky ng may apat na kabayong agwat sa pumangalawang si Don Pedro habang tumersero si Time Traveller.

Ginabayan ni jockey Cezar B. Ardona, inirehistro ni Super Spunky ang tiyempong 1:01 minuto sa 1,000 meter race sapat upang hamigin ng winning horse owner na si JA DiChaves ang P20,000 added prize.

Pumang-apat sa nasabing karera ang Batang Batute na ginabayan ng hineteng si Isaac Ace Aguila.

Samantala, inihahanda ang Super Spunky sa susunod na karerang tatakbuhin kaya naman tiyak na aabangan ito ng kanyang mga tagahanga.

Nasiyahan naman ang racing aficionados noong Linggo dahil umabot sa walong races ang pinakawalan ng Metro Manila Turf Club Inc. (MMTCI).