Street Smart, mahusay, wagi sa Handicap System

ni Green Lantern - @Renda at Latigo |November 28, 2022

Nasilayan ng mga karerista ang husay ni Street Smart matapos manalo sa PHILRACOM Rating Based Handicapping System na inilarga sa Metro Turf, Malvar - Tanauan City sa Batangas.

Sinakyan ni jockey RC Suson, inirehistro ni Street Smart ang tiyempong 1:26.8 sa 1,400 meter race sapat upang ibulsa ng winning horse owner ang P150,000 na premyo.

Dumating na segundo si Moves Like Jagger na humamig ng P50,000 tersero si Smiling Lady na sumikwat ng P25,000 habang pumang-apat si Central Bank na sumungkit ng P12,500 sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, naghayag ng paglahok si Jaguar sa Philippine Racing Commission 2nd Leg Juvenile Stakes Race na ilalarga sa parehong lugar Disyembre 4.

Nakaraan lamang ay nagwagi si Jaguar sa MARHO Breeders' 2-Year-Old Juvenile Colts na pinakawalan sa parehong lugar.

Gagabayan ni veteran jockey Fernando Raquel, makakaharap ni Jagar ang magkakamping sina Istulen Ola at Winner Parade sa distansiyang 1,400 meter race.

Nakalaan ang garantisadong premyo na P1.8M, ang ibang nagsaad ng pagsali ay sina Earli Boating, Gintong Hari, Grand Monarch, La Trouppei, Light Bearer, Orange Bell, Rough Cut at Secretary.

Hahamigin ng mananalo ang P1.080-M, may P360,000 ang ibubulsa ng second placer habang tig- P180,000, P90,000, P54,000 at P36,000 ang third hanggang sixth ayon sa pagkakahilera.