SP Chiz, join na sa pag-atake sa pamilya Duterte

ni Pablo Hernandez @Prangkahan | August 13, 2024

HINDI HOLIDAYS ANG DAPAT PAGDISKITAHAN, KUNDI ANG PORK BARREL -- Nais ni Senate President Chiz Escudero na “bawasan” o limitahan ang mga holiday sa bansa dahil masyado na raw marami ang mga holiday sa Pilipinas.

Hay naku, imbes ang pabawasan ni Escudero ay iyong pork barrel ng mga senador at kongresista kasi ayon mismo kay former Sen. Ping Lacson, bilyunan na raw ang pork barrel projects ng mga lawmakers, eh, ang napagdidiskitahan ay iyong holidays sa ‘Pinas, tsk!

XXX

KAPAG SINUPORTAHAN NI PBBM ANG PANUKALA NI SP CHIZ, BAKA IBASURA NG MILYUN-MILYONG MANGGAGAWA ANG MGA SENATORIAL CANDIDATE NG MARCOS ADMIN -- Umuusok sa galit ang mga manggagawa sa panukala ni Sen. Chiz na limitahan ang holidays, kasi sa totoo lang, ang holidays ay pabor sa labor sector.

Kaya’t kapag ‘yang panukala ni Escudero ay sinuportahan ni Pres. Bongbong Marcos (PBBM), tiyak malaki ang magiging epekto nito sa mga senatorial candidate ng Marcos administration. Baka ang lahat ng kandidato ni PBBM sa pagka-senador ay ibasura ng milyun-milyong manggagawa, period!

XXX

JOIN NA RIN SI SP ESCUDERO SA ATAKE SA PAMILYA DUTERTE -- Naki-join na rin si SP Chiz Escudero sa pag-atake sa pamilya Duterte.

Matapos kasing sabihin ni VP Sara Duterte-Carpio na walang plano ang Marcos admin para resolbahan ang baha sa bansa, ang resbak ni SP Chiz ay sa nakalipas daw na 6 years sa puwesto ni ex-P-Duterte ay hindi nito nagawang solusyunan ang baha sa ‘Pinas, boom!

XXX

DAMING SUPPORTERS, DAMING BARIL NI QUIBOLOY, KAYA NORMAL LANG NA ANG DAMING PULIS NA MAGSILBI NG WARRANT OF ARREST -- Sa Senate hearing ay kinuwestyon ni Sen. Ronald Dela Rosa na ang dami ng mga pulis na nagse-serve ng pag-iisyu ng warrant of arrest noon laban kay Pastor Apollo Quiboloy sa simbahan nitong Kingdom of Jesus Christ (KOJC) sa Davao City.

Aba’y sa totoo lang, tama na maraming pulis ang mag-isyu ng warrant of arrest kasi kita naman na ang daming supporters ni Quiboloy na nakapaligid sa KOJC church, at bukod diyan on the record sa Firearms and Explosives Office (FEO) sa Camp Crame ay sangkaterbang baril meron ang pastor, period!