Social protection at safety nets para sa kababaihan, ayos!

ni Nancy Binay - @Be Nice Tayo | March 11, 2021

Kasama ng iba pang miyembro ng Senate women committee, naghain tayo ng panukalang-batas na naglalayong masiguro ang kapakanan ng kababaihan sa panahon ng sakuna at pandemya.

Noong Lunes, sa selebrasyon ng International Women’s Day, inihain ang Senate Bill No. 2086 o “Gender Responsive and Inclusive Pandemic Management Act of 2021.”

Ang mga kasapi ng women committee ay sina Sen. Risa Hontiveros, Pia Cayetano, Leila de Lima, Imee Marcos, Grace Poe, Cynthia Villar at ang inyong lingkod.

☻☻☻

Nais ng SB No. 2086 na magpatupad ng mga social protection at safety nets para sa kababaihan, bilang pagtugon sa pagtaas ng bilang ng kaso ng karahasan laban sa kababaihan sa panahon ng pandemya.

Ayon sa United Nations Population Fund, tinatayang umangat ng 20 percent ang global domestic violence, habang nagkaroon naman ng 16 percent na pagtaas sa Pilipinas.

Layunin din ng panukalang-batas na isama ang kababaihan sa paglikha ng pandemic management guidelines, at masiguro ang access at patuloy na operasyon ng mga gender desk at health services, kasama na ang probisyon ng sapat na pondo para sa mga ganitong inisyatiba.

☻☻☻

Marami pang aspeto ng women’s protection and participation ang nakalatag sa panukalang-batas.

Inaanyayahan natin ang kababaihan at maging ang iba pa nating kababayan na basahin ang panukalang-batas sa kabuuan nito nang mabigyang-linaw din ang lahat kung ano ang mga pagkukulang at maaaring susugan sa kasalukuyang mga proseso natin.

Kung may nais kayong idagdag o klaruhin, bukas ang tanggapan naming 7 lady senators para sa inyo.

☻☻☻

Paalala lamang sa lahat na manatili sa loob ng bahay, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay