Seguridad sa pamamasukan ng kasambahay; mga dahilan upang wakasan ang kanilang pamamasukan

ni Atty. Persida Rueda-Acosta - @Magtanong Kay Attorney | September 2, 2022

Dear Chief Acosta,

Nawalan ako ng kasambahay nang magsimula ang pandemya noong 2020 sapagkat umuwi siya sa kanilang probinsya. Bagama’t maraming naging pagbabagong idinulot ang mga community quarantine ay kahit papaano nagagawa ko ang lahat ng gawaing bahay kahit na kami ay work-from-home. Malaking kabawasan sa abala dahil hindi nasasayang ang oras sa pagbabiyahe at hindi na rin kinailangang mamasahe kaya’t nakatipid ako kahit papaano. Ngunit ngayong taon ay napilitan akong kumuhang muli ng kasambahay dahil araw-araw na akong pumapasok.

Ang problema ko naman ay napakapabaya ng kasambahay na nakuha ko at marami na rin siyang nagawa na naging sanhi ng sobrang sakit sa ulo ko. Maaari ko ba siyang tanggalin kahit na sa katapusan pa ng Setyembre mapapaso ang kontrata namin? Sa halip kasi na makatulong siya ay puro problema ang dulot niya, hindi lamang sa akin kundi pati na rin sa mga kapitbahay ko. - Jessa

Dear Jessa,

Ang kasambahay, tulad ng ibang manggagawa sa pribado o pampublikong sektor ay pinagkakalooban ng seguridad sa pamamasukan o security of tenure. Sa pangkalahatan, batay sa ating batas, hindi maaaring tapusin ng employer ang pamamasukan ng kasambahay bago mapaso ang kanilang kasunduan o contract of employment.

Subalit, kung mayroong sapat na legal na basehan ay pinapayagan ang employer na wakasan ito kahit hindi pa dumarating ang itinakda nilang panahon. Alinsunod sa mga alituntuning nakasaad sa Republic Act No. 10361, o mas kilala bilang “Domestic Workers Act” o “Batas Kasambahay”:

“SEC. 32. Termination of Service. – Neither the domestic worker nor the employer may terminate the contract before the expiration of the term except for grounds provided for in Sections 33 and 34 of this Act. x x x

If the duration of the domestic service is not determined either in stipulation or by the nature of the service, the employer or the domestic worker may give notice to end the working relationship five (5) days before the intended termination of the service.

The domestic worker and the employer may mutually agree upon written notice to pre-terminate the contract of employment to end the employment relationship.x x x

Section 34. Termination Initiated by the Employer. – An employer may terminate the services of the domestic worker at any time before the expiration of the contract, for any of the following causes:

(a) Misconduct or willful disobedience by the domestic worker of the lawful order of the employer in connection with the former’s work;

(b) Gross or habitual neglect or inefficiency by the domestic worker in the performance of duties;

(c) Fraud or willful breach of the trust reposed by the employer on the domestic worker;

(d) Commission of a crime or offense by the domestic worker against the person of the employer or any immediate member of the employer’s family;

(e) Violation by the domestic worker of the terms and conditions of the employment contract and other standards set forth under this law;

(f) Any disease prejudicial to the health of the domestic worker, the employer, or member/s of the household; and

(g) Other causes analogous to the foregoing.” (Binigyang-diin)

Samakatwid, maaari mong wakasan ang pamamasukan ng iyong kasambahay kahit hindi pa dumarating ang itinakdang petsa ng pagpapaso ng inyong kasunduan kung nagawa niya ang alinman sa mga nabanggit na legal na dahilan sa ilalim ng Section 34 ng R. A. No. 10361. Partikular dito, kung mayroon siyang nagawang misconduct o tahasang paglabag sa iyong legal na utos kaugnay ng kanyang trabaho o kaya ay may malubha o nakagawian siyang pagpapabaya o kawalan ng husay tungkol sa kanyang mga tungkulin.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.