Sara, hinarang ng ina... Baste sa pagka-pangulo

ni Mylene Alfonso @News | October 7, 2026

Photo: Baste Duterte - Senate PH

Pinapauwi na si Vice President Sara Duterte ng kanyang ina na si Elizabeth Zimmerman para bumalik na lamang siya sa local politics sa Davao sa halip na tumakbo sa national position sa 2028 elections.

Ayon kay Duterte, iminungkahi rin umano ng kanyang ina na ang kanyang kapatid na si Davao City Mayor Sebastian “Baste” Duterte ang tumakbo sa national elections.

“

Nagsabi talaga ‘yung nanay ko na pinapauwi niya ako ng Davao at si Baste na lang ang patakbuhin sa national elections,” sabi ni VP Sara.

Ito ang tugon ng Bise Presidente nang tanungin kung isinasaalang-alang niyang itulak si Baste na tumakbo sa national position bilang alternatibo sa kanyang kandidatura matapos ang pagtestigo ng kanyang kapatid sa Senate impeachment court.

Paglilinaw ng Vice President, wala pa umanong napag-uusapan sa kanilang pamilya kung sino ang partikular na kandidato para sa national elections.

“Sa pamilya namin ‘yun lang ang napag-usapan… Hindi napag-usapan… Sinabi ng nanay ko, sabi niya, umuwi ka dito sa Davao tapos bahala na si Baste diyan sa national,” paliwanag ni VP Sara.

Iginiit din niya na wala pa siyang iniisip na partikular na tao na kanyang hihikayatin na tumakbo sa halalan.

“Wala pa akong iniisip na tao na sasabihin ko na tumakbo ka. Sa tingin ko sa ugali ko naman, wala akong sasabihan na tumakbo ka,” wika ni VP Sara.

Dagdag pa niya, ang pagtakbo sa halalan ay dapat manggaling mismo sa desisyon ng isang tao.

“Kasi para sa akin, and personal experience ko ito, ang pagtakbo talaga dapat personal na desisyon,” saad pa ng Bise Presidente.

Samantala, sinabi naman ni Palace Press Officer Undersecretary Claire Castro na dapat munang pagtuunan ng pansin ng mga opisyal ang kanilang trabaho para sa mga Pilipino bago isipin ang pangangampanya para sa 2028 elections.

“Trabaho muna para sa mga kababayan natin ang unahin hindi puro pangangampanya para maiangat ang mga sarili,” punto ni Castro 

“Wala na ngang naitutulong sa bayan, nakakabigat pa sa ekonomiya ang mga taong puro paninira lang ang alam. Ang totoong public servant… masipag umaksyon para sa bayan… hindi puwedeng walang alam ang laging panangga sa ibinabatong anomalya sa kanya,” hirit ng Palace official.