Solusyon ng pangulo, inismol... Sara kay BBM: Pagkain sa El Niño, 'di balde

ni Mylene Alfonso @News | November 9, 2026

Photo: File / Inday Sar Duterte at Bongbong Marcos - FB

Muling pinasaringan ni Vice President Sara Duterte si Pangulong Ferdinand Marcos Jr. kaugnay ng naging panawagan na maghanda ng mga balde sa inaasahang epekto ng El Niño.

Ayon kay Duterte, matindi at hindi pangkaraniwan ang mga babala ng mga eksperto hinggil sa posibleng epekto ng El Niño, na maaaring umabot sa matinding drought o tagtuyot kung saan tuluyang matutuyo ang mga pinagkukunan ng tubig.

“Hindi ko na rin talaga alam kung bakit umabot na sa balde,” ani Duterte, sabay-diin na hindi makatutulong ang paghahanda ng maraming balde kung wala namang tubig na maiimbak.

“Sobra ang warning ng mga experts sa El Niño at hindi pangkaraniwan; sinasabi nila na mayroon talagang punto na aabot sa drought, ibig sabihin ay tuyo na talaga at wala nang tubig,” ani Duterte.

Giit ng Bise Presidente, higit na dapat pagtuunan ng pamahalaan ang paghahanda sa posibleng kakulangan ng suplay ng pagkain kapag naapektuhan at nasira ang mga pananim dahil sa tagtuyot.

Ipinaliwanag din niya na kung kakailanganing mag-import ng pagkain, posibleng mas mataas na ang halaga ng dolyar laban sa piso sa panahong iyon, na magpapamahal sa inaangkat na produkto.

Binigyang-diin ni Duterte na hindi lamang ang suplay ng tubig ang dapat paghandaan ng pamahalaan kundi maging ang posibleng pagtaas ng presyo ng pagkain at ang epekto nito sa mga mamamayan.

“Kahit ilan pang balde ang ihanda mo diyan, hindi iyan makatutulong. Ang kailangang paghandaan ng pamahalaan ay kung ano ang magiging suplay ng pagkain pagdating ng panahong iyan. Ibig sabihin, kapag nasira ang ating mga ani at kinailangang mag-import, magkano na kaya ang dolyar sa panahong iyon? Hindi na siguro P63 o P64. Ibig sabihin, bibili tayo ng mas mahal na pagkain. Kaya kailangang paghandaan ang pagtaas ng presyo ng mga bilihin, hindi lang ang mga balde-balde,” pagtatapos ni Duterte.

Sariling gastos... VP Sara, biyaheng Hong Kong

ni Mervin Reyes @News | November 7, 2026

Photo: File / VP Sara Duterte

Tutungo sa Hong Kong si Vice President Sara Duterte mula Nobyembre 6 hanggang 8, 2026, upang dumalo sa ilang aktibidad, kabilang ang isang pagtitipon na inorganisa ng Filipino community doon, ayon sa Office of the Vice President (OVP) nitong Biyernes.

Ayon sa OVP, personal na pondo ni Duterte ang gagamitin sa biyahe at walang pera, kagamitan o pasilidad ng gobyerno ang gagamitin kaugnay nito.

Nakakuha rin umano ang Bise Presidente ng pahintulot mula sa Quezon City Regional Trial Court Branch 98 sa pamamagitan ng kautusang may petsang Nobyembre 3. Naglabas din ang Office of the President ng kaukulang travel authority.

Matatandaang magpapatuloy sa Lunes, Nobyembre 9, ang impeachment trial ni Duterte, kung saan nakatakdang ilahad ng defense panel ang kanilang mga ebidensya.

Pinirmahang 2024, 2025, 2026 budget, ilegal... BBM, lagot! — Sara

ni Mylene Alfonso @News | October 22, 2026

Photo: Inday Sara Duterte at Bongbong Marcos - FB

Hinamon ni Vice President Sara Duterte si Pangulong Ferdinand Marcos Jr. na magpaliwanag kung bakit nilagdaan nito ang mga pambansang badyet na kalaunan ay idineklarang labag sa Konstitusyon ng Korte Suprema (SC).

Ayon kay Duterte, hindi umano sumunod ang mga nasabing badyet sa mga panukalang paggasta na isinumite mismo ng administrasyon sa Kongreso.

Sinita rin ng Bise Presidente ang mga miyembro ng Kongreso sa kanilang papel sa pagpasa ng mga badyet, at inakusahan ang bicameral conference committee na hindi na ginagampanan ang tungkulin nitong masusing suriin ang mga panukalang paggasta, sa halip na nagsisilbi umanong “stamping pad” ng Malacañang.

“Ang pambansang badyet ay pera ng taumbayan, hindi kasangkapan sa pamumulitika at personal na interes ng mga nasa pwesto sa gobyerno,” ani Duterte.

“Ipinagtanggol ng Korte Suprema ang batas. Ngayon, panahon na upang managot sa taumbayan si Pangulong Marcos at ang mga miyembro ng Kongreso,” wika pa niya.

Sinabi ni Duterte na pinagtibay ng desisyon ng Korte Suprema ang kanyang babala noong 2024 na hindi na umano ginagampanan ng bicameral conference committee ang orihinal nitong tungkulin na suriin at pag-isahin ang magkahiwalay na bersyon ng badyet na inaprubahan ng House of Representatives at Senado.

Idineklara ng Korte Suprema na labag sa Konstitusyon ang General Appropriations Act (GAA) para sa 2024 matapos dagdagan ng Kongreso ng P449.5 bilyon ang unprogrammed appropriations, mula sa P281.9 bilyong nakasaad sa National Expenditure Program (NEP) tungo sa P731.4 bilyon sa pinagtibay na badyet.

Idineklara rin ng mataas na hukuman na labag sa Konstitusyon ang 2025 budget dahil sa P17.99 bilyong dagdag sa Special Road Fund ng Department of Public Works and Highways (DPWH).

Bukod dito, pinawalang-bisa rin ng SC ang ilang probisyon sa 2026 budget na may kaugnayan sa pagpapalabas ng unprogrammed appropriations dahil sa kakulangan ng mga pananggalang at masyadong malawak na mga kondisyong maaaring gamiting batayan sa pagkuha ng pondo.

Ang unprogrammed appropriations ay mga nakalaang pondong maaaring ilabas kapag natugunan ang mga itinakdang kondisyon, gaya ng paglampas ng koleksiyon ng kita ng pamahalaan sa target nito.

Nilinaw naman ng Korte Suprema na hindi awtomatikong labag sa Konstitusyon ang naturang mga pondo, ngunit kailangang sumunod ang mga ito sa mga limitasyong itinakda ng Konstitusyon at magkaroon ng malinaw na prayoridad sa paggasta.

Samantala, sinabi ng Malacañang nitong na hihilingin nito sa Korte Suprema na muling pag-aralan ang ilang bahagi ng desisyon.

Ayon kay Palace Press Officer Undersecretary Claire Castro, hindi sang-ayon ang administrasyon sa mga kondisyong itinakda ng hukuman para sa pagpapalabas ng unprogrammed appropriations.

Iginiit din ng Palasyo na hindi dapat managot si Marcos sa paglagda sa mga nasabing badyet.