Salpukan ng mga momshies… RUFFA, MARIEL AT CIARA, PANTAPAT KINA JOLINA, MELAI AT REGINE

ni Erlinda Rapadas - @Teka Nga | October 26, 2022

Daily ding mapapanood ang woman's show nina Ruffa Gutierrez, Mariel Padilla at Ciara Sotto sa AMBS o AllTV Network. Wala pa lang detalye kung anong oras ito ieere pero marami na ang nagsasabing tiyak na itatapat ito sa programang Magandang Buhay hosted by Jolina Magdangal, Melai Cantiveros at Regine Velasquez.

Magsasalpukan ang dalawang shows at bahala na ang mga viewers na mamili kung ano ang kanilang panonoorin.

Ilang taon na sa ere ang Magandang Buhay na ang original hosts ay sina Karla Estrada, Jolina at Melai. Bago nag-eleksiyon noong Mayo, 2022 ay nag-leave si Karla sa show dahil sumuporta siya sa isang partylist.

Nang matapos ang eleksiyon ay hindi na siya nakabalik sa Magandang Buhay kaya ipinalit sa kanya ang Asia's Songbird na si Regine Velasquez na tinanggap naman ng mga viewers.

Malawak na ang viewership ng Magandang Buhay dahil ilang taon na itong napapanood. Pero tiyak na may bagong maio-offer ang show nina Ruffa, Mariel at Ciara para sa mga viewers.

Malaking challenge para sa kanila ang anumang show na makakatapat nila. Kailangan lang na may malaki silang istorya at guest celebrities upang makuha ang pansin ng mga manonood.