Sablay ang Akbayan, akalang bilyun-bilyon ang laman ng SALN ng mag-amang Duterte, hindi pala

ni Pablo Hernandez @Prangkahan | November 25, 2025

MABABAWASAN ANG GALIT NG MGA DDS KAPAG NAAPRUB ANG INTERIM RELEASE KAY FPRRD, PERO KAPAG NA-REJECT LALONG UUSOK SA GALIT KAY PBBM ANG MGA DUTERTE SUPPORTER -- Sa November 28, 2025 (Friday) ay ila-live stream ng International Criminal Court (ICC) ang pinal nilang desisyon kung pagbibigyan ang interim release kay former Pres. Rodrigo Roa Duterte (FPRRD) sa kadahilanang matanda, may sakit at mahina na ang ex-president, na hindi na nito kayang humarap sa paglilitis kaugnay sa kinakaharap niyang kasong crime against humanity sa ICC.

Sakaling pagbigyan ng ICC ang interim release kay FPRRD at pumayag ang Marcos administration na pauwiin ito sa Davao City ay kahit paano mababawasan ang galit ng mga Duterte Diehard Supporters (DDS) kay Pres. Bongbong Marcos (PBBM), pero kapag tinabla ng ICC ang hirit na pagpapalaya sa dating pangulo ay asahan na ni Pres. Ferdinand Marcos, Jr. na lalong uusok sa galit sa kanya ang mga tagasuporta ng ex-president, abangan! 

XXX

SANA ALL NG SENADOR TULAD NI SEN. BONG GO NA AFTER ELECTION, IWAS SA BANGAYANG PULITIKA, TUTOK SA SERBISYO SA MAMAMAYAN ANG INAATUPAG -- Habang mainit ang bangayang pulitika sa bansa, may isang senador, na ang inaatupag ay mag-ikot sa iba’t ibang public hospitals at dito ay kanyang nalaman na sa kabila na aprubado na ang kanyang batas na dagdagan ang mga kama sa mga pampublikong pagamutan, ay natuklasan niya na marami pa rin sa mga ospital ang kapos ang mga kama para sa mga pasyente. 

Dahil diyan ay nanawagan si Sen. Bong Go sa pamahalaan na tugunan ang kakapusan ng mga kama para sa mga public hospital.

Sana all ng senador ay tulad ni Sen. Bong Go na nang manalo after election ay tutok sa serbisyo ang inaatupag, inaalam ang serbisyong puwedeng ipagkaloob sa mamamayan at hindi nakiki-join sa bangayang pulitika sa ‘Pinas, period!

XXX

‘SUNTOK SA BUWAN’ NA MAAPRUB ANG HIRIT NI SEN. PADILLA NA PEDERALISMO -- Dahil sa mainit na usaping pampulitika sa bansa, ay isinulong ni Sen. Robin Padilla ang pederalismo o federal form of gov’t., na ang layunin ay magkaroon ng kanya-kanyang kapangyarihan, batas at pagpapalago ng ekonomiya ang bawat rehiyon sa Luzon, Visayas at Mindanao na ang magpapatakbo ng mga pamahalaan dito ay mga mahahalal na interim prime minister, may mga sariling cabinet members, senador, kongresista, local gov’t. units (LGUs), dahil sa sistema ngayon ng presidential form of gov’t. ay iisa lang ang may kapangyarihan at ito ay ang presidente na nasa Malacañang, na nasa Metro Manila na parte ng Luzon.

Sa totoo lang, mainam ang panukalang ito ni Sen. Padilla, kaya lang ay "suntok sa buwan" na maaprubahan itong federal form of gov’t. dahil isinulong na rin ng noo’y Pres. Rodrigo Roa Duterte ang pederalismo, pero ni-reject lang ito ng majority senators at congressmen ng ‘Pinas, tsk!

XXX

AKBAYAN SUMABLAY, AKALA NILA BILYUN-BILYON ANG KAYAMANAN NG MAG-AMANG DUTERTE, HINDI PALA DAHIL SA SALN NI FPRRD P37.3M LANG AT KAY VP SARA P88.5M LANG -- Sablay ang Akbayan sa kinuha nilang Statement of Assets, Liabilities and Net Worth (SALN) nina FPRRD at Vice President Sara Duterte-Carpio.

Inakala kasi ng Akbayan na bilyun-bilyong piso ang laman ng SALN ng mag-amang Duterte, pero nang makakuha sila ng kopya, eh ang laman lang pala ng SALN ni FPRRD ay P37.3 million, at ang kay VP Sara ay P88.5 million, boom!