Sa panahon ngayon, ospital na lang ang kumikita, period!

ni Ka Ambo - @Bistado | November 3, 2020

Undas kahapon pero kinansel.

Linsiyak!

◘◘◘

Daplis sa Metro Manila ang super typhoon na si Rolly.

Salamat kay Lord!

◘◘◘

Napinsala nang malaki ang Catanduanes at Albay.

Paano kung naubos na ang calamity fund?

◘◘◘

Kabit ni Rolly ang Bagyong Siony.

Ayaw talagang tantanan ang mga Pinoy!

◘◘◘

Sem break sa private school.

Wala lang, ganun din sa bahay lang!

◘◘◘

Nagsarado ang maraming negosyo.

May pumalit na bagong negosyo sa nagsaradong tindahan.

Lugi rin, sarado ulit!

◘◘◘

Kung balak mong magnegosyo—handa ka ba magpakalugi sa loob ng 6 buwang singkad?

Walang kustomer dahil hindi naglalamyerda ang mga tao!

◘◘◘

Sa Australia, sinasabing maraming cash ang mga bangko—pero walang nangungutang.

Bakit mangungutang ng pangnegosyo—gayung alam mong lugi sa loob ng 6 buwan?

◘◘◘

Magsisimula nang magputol ng kontador ang Meralco at Maynilad.

Lalong maraming negosyo ang magsasarado!

◘◘◘

Nanatiling bukas at naghihingalo ang mga negosyo—nakatengga ang “disconnection”.

Pero ngayon, puwede nang magputol, tuluyan nang isasarado ang negosyo—tatakbuhan ang Maynilad, Manila Water, Meralco at mga kooperatiba!

◘◘◘

Malinaw na taghirap ang Pasko at ang buong 2021.

May mga pera ang kapitalista, pero wais ang mga ‘yan—hindi maglalabas ng capital!

◘◘◘

Bubuhayin sana ang lokal na turismo.

Pero, marami pang-tse-tse-buretshe.

Dahil d’yan, hindi pa ring maglalamyerda ang mga Pinoy!

◘◘◘

Lugi ang mga mall—magbabayad ng elektrisidad, pero walang “benta”.

Isang malungkot na eksena na ang ating henerasyon lang ang nakaranas!

◘◘◘

Halos walang negosyo na nagkiklik, maliban ang mga ospital.

Tumatabo ang mga ospital na nagkukunwaring naglulugi!