Sa botong 284-8-42... Impeachment kay PBBM, patay na

ni Mylene Alfonso @News | February 11, 2026

Photo: PBBM

Tuluyan nang ibinasura ng House of Representatives ang dalawang impeachment complaint na inihain laban kay Pangulong Ferdinand Marcos, Jr. dahil sa insufficiency in substance.

Sa botohan, 284 ang pabor sa pagbasura, walo ang tutol at apat ang nag-abstain, pinagtibay ng mababang kapulungan ang House Resolution 746 at ang naging findings sa Committee Report 111 sa pagbasura sa mga reklamong isinampa ni Andre de Jesus at ng Makabayan bloc.

Una nang idineklara ng House Justice Committee na ang mga reklamo ay “insufficient in substance” o kulang sa matibay na batayan.

“The impeachment complaints against President Ferdinand "Bongbong" Marcos Jr. are hereby dismissed,” pahayag ni House Deputy Speaker Janette Garin habang nasa plenary session.

Matatandaang ipinasa ng House Justice Committee sa plenaryo ang committee report noong Martes, isang araw matapos itong aprubahan, dahil itinuturing insufficient in substance.

Samantala, nasiyahan ang Pangulo sa naging desisyon ng Kamara na ibasura ang dalawang impeachment complaint laban sa kanya, na sinuportahan ng 284 kongresista.

"Nasisiyahan po ang Pangulo sa naganap na proseso sa House of Representatives. Natutuwa po ang Pangulo na 284 na miyembro ng House of Representatives ang naniniwala sa katotohanan at nagpasyang ibasura ang impeachment complaints laban sa kanya,” wika ni Palace Press Officer Undersecretary Claire Castro.