Pangulo, seryoso na raw... Abusado, magnanakaw, out sa gobyerno — PBBM

ni Mylene Alfonso @News | November 4, 2026

Photo: File / Bongbong Marcos - FB

Walang lugar sa gobyerno ang mga opisyal na nagnanakaw at umaabuso sa pondo ng bayan.

Ito ang mariing mensahe ng Malacañang sa mga mapagsamantalang opisyal kasabay ng paninindigan ni Pangulong Ferdinand Marcos Jr. na hindi kukunsintihin ang anumang budget amendments na walang sapat na dokumento, malinaw na deskripsyon at konkretong proyektong paglalaanan ng pondo.

Ayon kay Palace Press Officer Undersecretary Claire Castro, malinaw ang utos ng Pangulo na ang pondo ng bayan ay dapat mapakinabangan ng taumbayan at hindi mapunta sa bulsa ng sinuman.

“Hindi ito sweet talks katulad noong sinasabi ng iba. Ginawa na ng Pangulo, inumpisahan na ng Pangulo para iparamdam sa mga nang-aabuso sa pondo na wala kayong lugar at mapuwesto sa gobyerno kung kayo ay magnanakaw lang,” diin ni Castro.

Ang pahayag ay kasunod ng mga kinukuwestiyong insertion at red flags sa House version ng 2027 national budget na binabantayan ng mga business group, civil society at ilang senador. 

Piso vs. dolyar, P64+ na... Don't panic — PBBM

ni Mylene Alfonso @News | October 29, 2026

Photo: Pangulong Bongbong Marcos - FB

Pinawi ni Pangulong Ferdinand Marcos Jr. ang mga pangamba sa gitna ng patuloy na paghina ng piso matapos lumagpas sa P64 kada isang dolyar at magtala ng panibagong pinakamababang halaga sa kasaysayan.

“Well, first of all, do not take it with alarm. Don’t panic,” pahayag ni Marcos sa ambush interview sa New Bilibid Prison sa Muntinlupa City nitong Miyerkules, kaugnay ng pagdiriwang ng ika-32 National Correctional Consciousness Week.

Ayon sa Pangulo, ginagawa ng kanyang administrasyon ang lahat ng makakaya upang maipagtanggol ang halaga ng piso laban sa dolyar.

“People can take solace in the fact that our policy towards the peso is to continue to defend the peso as hard as we possibly can. We have all the tools to defend the peso. We have all the means to defend the peso,” punto ni Marcos.

Dagdag pa niya, patuloy na kikilos ang pamahalaan upang hindi na lalo pang humina ang piso, partikular laban sa dolyar na lumalakas din ang halaga.

Nagtala ang piso ng intraday low na P64.18 kada dolyar, na mas mababa kaysa sa naitalang P64.17 kada dolyar sa pagsasara ng kalakalan noong Martes.

Nabatid na iniuugnay ang patuloy na paghina ng lokal na pera sa pagtaas ng presyo ng krudo sa pandaigdigang merkado bunsod ng krisis sa Middle East.

Kabilang din sa mga binanggit na dahilan ang pagmahal ng langis at mga produktong petrolyo.

Gayunman, tiniyak ni Marcos na nananatiling malusog ang foreign exchange reserves ng bansa, na ginagamit ng pamahalaan upang makatulong na ipagtanggol ang piso.

“D'yan tayo kumukuha para i-defend ‘yung peso. So we will continue to defend the peso,” pahayag ng Pangulo.

Nangako rin ang Pangulo na tutugunan ang nakaambang pagtaas sa mga presyo ng pagkain.

“The inflation is coming from the supply side. It’s a supply-side inflation. So monetary measures can only go so far. We have to do other ways,” paliwanag niya.

Bagama’t aminadong walang direktang kontrol ang pamahalaan sa pandaigdigang presyo ng langis, sinabi ni Marcos na may mga hakbang itong maaaring gawin upang mapababa ang presyo ng pagkain.

“Oil, we can do nothing about. Food, we can. And we are doing, again, everything that we can to make sure that the prices of food come down,” dagdag ng Pangulo.

Pinirmahang 2024, 2025, 2026 budget, ilegal... BBM, lagot! — Sara

ni Mylene Alfonso @News | October 22, 2026

Photo: Inday Sara Duterte at Bongbong Marcos - FB

Hinamon ni Vice President Sara Duterte si Pangulong Ferdinand Marcos Jr. na magpaliwanag kung bakit nilagdaan nito ang mga pambansang badyet na kalaunan ay idineklarang labag sa Konstitusyon ng Korte Suprema (SC).

Ayon kay Duterte, hindi umano sumunod ang mga nasabing badyet sa mga panukalang paggasta na isinumite mismo ng administrasyon sa Kongreso.

Sinita rin ng Bise Presidente ang mga miyembro ng Kongreso sa kanilang papel sa pagpasa ng mga badyet, at inakusahan ang bicameral conference committee na hindi na ginagampanan ang tungkulin nitong masusing suriin ang mga panukalang paggasta, sa halip na nagsisilbi umanong “stamping pad” ng Malacañang.

“Ang pambansang badyet ay pera ng taumbayan, hindi kasangkapan sa pamumulitika at personal na interes ng mga nasa pwesto sa gobyerno,” ani Duterte.

“Ipinagtanggol ng Korte Suprema ang batas. Ngayon, panahon na upang managot sa taumbayan si Pangulong Marcos at ang mga miyembro ng Kongreso,” wika pa niya.

Sinabi ni Duterte na pinagtibay ng desisyon ng Korte Suprema ang kanyang babala noong 2024 na hindi na umano ginagampanan ng bicameral conference committee ang orihinal nitong tungkulin na suriin at pag-isahin ang magkahiwalay na bersyon ng badyet na inaprubahan ng House of Representatives at Senado.

Idineklara ng Korte Suprema na labag sa Konstitusyon ang General Appropriations Act (GAA) para sa 2024 matapos dagdagan ng Kongreso ng P449.5 bilyon ang unprogrammed appropriations, mula sa P281.9 bilyong nakasaad sa National Expenditure Program (NEP) tungo sa P731.4 bilyon sa pinagtibay na badyet.

Idineklara rin ng mataas na hukuman na labag sa Konstitusyon ang 2025 budget dahil sa P17.99 bilyong dagdag sa Special Road Fund ng Department of Public Works and Highways (DPWH).

Bukod dito, pinawalang-bisa rin ng SC ang ilang probisyon sa 2026 budget na may kaugnayan sa pagpapalabas ng unprogrammed appropriations dahil sa kakulangan ng mga pananggalang at masyadong malawak na mga kondisyong maaaring gamiting batayan sa pagkuha ng pondo.

Ang unprogrammed appropriations ay mga nakalaang pondong maaaring ilabas kapag natugunan ang mga itinakdang kondisyon, gaya ng paglampas ng koleksiyon ng kita ng pamahalaan sa target nito.

Nilinaw naman ng Korte Suprema na hindi awtomatikong labag sa Konstitusyon ang naturang mga pondo, ngunit kailangang sumunod ang mga ito sa mga limitasyong itinakda ng Konstitusyon at magkaroon ng malinaw na prayoridad sa paggasta.

Samantala, sinabi ng Malacañang nitong na hihilingin nito sa Korte Suprema na muling pag-aralan ang ilang bahagi ng desisyon.

Ayon kay Palace Press Officer Undersecretary Claire Castro, hindi sang-ayon ang administrasyon sa mga kondisyong itinakda ng hukuman para sa pagpapalabas ng unprogrammed appropriations.

Iginiit din ng Palasyo na hindi dapat managot si Marcos sa paglagda sa mga nasabing badyet.