Russia, pinatalsik sa World Cup, banned sa int'l competitions

ni MC - @Sports | March 2, 2022

Tanggal na ang Russia sa World Cup matapos suspendihin sa lahat ng international competitions "until further notice", iyan ang anunsiyo ng FIFA at UEFA sa isang joint statement nitong Lunes, habang ang European football governing body ay tinapos na rin ang partnership sa Russian energy giant Gazprom.

Maglalaro pa naman ang men's team sa isang qualifying play-offs sa March para sa World Cup sa Qatar sa huling bahagi ng taon, habang ang women's side ay nagkuwalipika para sa European Championship sa England, na idaraos sa Hulyo.

Ang anunsiyo ay nakaapekto na rin sa mga Russian clubs sa iba't ibang kompetisyon sa Europa. "FIFA and UEFA have today decided together that all Russian teams, whether national representative teams or club teams, shall be suspended from participation in both FIFA and UEFA competitions until further notice," nakasaad sa joint statement ng governing bodies ng world at European football.

Nakaiskedyul sana ang Russian men's team na maglaro sa Poland sa World Cup qualifying play-off semifinal sa March 24, at maaring kaharapin ang Sweden o ang Czech Republic sa Marso 29 para pag-agawan ang finals sa Qatar.

Pero ang kanilang tatlong potensiyal na kalaban ay iboboykot ang mga matches. Unang inanunsiyo ng FIFA noong Linggo na ang Russian teams ay maaring magpatuloy na maglaro pero sa ilalim lamang ng Football Union of Russia, laro sa home games sa isang ligtas na teritoryo at closed doors ngunit hindi rin puwede ang kanilang bandila at anthem.

Pero ang mga hakbangin na iyon ay dinismis bilang "totally unacceptable" ni Polish FA president Cezary Kulesza at idinagdag na hindi lalaro ang Poland sa World Cup play-off kontra Russia, "no matter what the name of the team is."

Pero nagbago ng pananaw ang FIFA nitong Lunes, pinatalsik ang Russia sa kahit anong sport's showpiece tournament. "Football is fully united here and in full solidarity with all the people affected in Ukraine," dagdag sa statement.