Romualdez at Co, dapat imbestigahan din sa 2023 at 2024 budget insertions

ni Pablo Hernandez @Prangkahan | November 11, 2026

SA HINA NI SEN. RISA BAKA KAHIT SI CONG. PULONG ANG MAKALABAN NG SENADORA AY TALO ITO SA 2028 PRESIDENTIAL ELECTION — Matapos ianunsyo ni Naga City Mayor, former Vice President Leni Robredo, na hindi siya kakandidato sa pagka-presidente sa 2028 ay ikinalat na naman ng Akbayan sa social media ang “Risa Na 2028.”

Sa totoo lang, mahinang kandidato si Sen. Risa Hontiveros at patunay d’yan na naglalaro lang sa 1% hanggang 3% ang rating niya sa mga lumalabas na presidential survey, na ‘ika nga, kahit si Davao City 1st Dist. Rep. Paolo “Pulong” Duterte ang kumandidato, malaki ang posibilidad na talunin niya ang senadora, period!

XXX

SI SEN. BAM AQUINO ANG GUSTO NG MGA DILAWAN AT KAKAMPINK NA KUMANDIDATO SA PAGKA-PRESIDENTE, AYAW NILA KAY SEN. RISA HONTIVEROS — Kung inaakala ng Akbayan na si Sen. Risa Hontiveros na ang gagawing pambato ng mga Dilawan at Kakampink ay nagkakamali sila.

Ang pagpapakalat kasi ng Akbayan na “Risa Na 2028” ay sinabayan ng post sa social media ng “Bam Na 2028” na humihimok kay Sen. Bam Aquino na kumandidato sa pagka-presidente sa 2028.

Ibig sabihin niyan, tablado sa mga Dilawan at Kakampink ang kandidatura for president ni Sen. Risa, boom! 

XXX

DAPAT IMBESTIGAHAN NG OMBUDSMAN KUNG GAANO KARAMI ANG NAGING PROJECTS NINA CONG. ROMUALDEZ AT EX-CONG. ZALDY CO SA DPWH — Ibinulgar ni Department of Public Works and Highways (DPWH)-Programming Division chief Engr. Peter Paul Cortes na nagkaroon sina Leyte 1st Dist. Rep., former Speaker Martin Romualdez at former Ako Bicol partylist Rep. Zaldy Co ng 444 DPWH projects worth P27.43 billion noong year 2025.

Ang tanong: Noon kayang year 2023 at year 2024 ay gaano naman kaya karaming projects ang ipinasok sa DPWH nina Romualdez at Co?

'Yan ang dapat imbestigahan ng Ombudsman, period!

XXX

KASAMA KAYA 'YUNG IBINULGAR NOON NI CONG. LEVISTE NA UMANO’Y STL-BOOKIES NINA ES. RECTO AT CONG. GARDIOLA SA IPINAI-STOP NG BATANGAS PNP? — Nagpalabas ng direktiba si Batangas PNP Director Col. Oliver Ebora sa mga kapulisan na ipa-stop ang lahat ng uri ng illegal gambling sa lalawigan.

Ang tanong: Kasama kaya sa ipinai-stop ni Col. Ebora 'yung ibinulgar noon ni Batangas 1st Dist. Rep. Leandro Leviste 'yung umano’y STL-bookies nina Executive Sec. Ralph Recto at CWS Partylist Rep. Edwin Gardiola? Boom!