Robin Hood, sasalang sa Travel City Grand Cup

ni Green Lantern - @Renda at Latigo |December 10, 2022

Aarangkada muli sa pista si Robin Hood pagsalang nito sa 9th Pasay ‘The Travel City’ Grand Cup na pakakawalan sa Metro Turf, Malvar - Tanauan City sa Batangas, bukas (Linggo).

Makakatagisan ng bilis ni Robin Hood sina Kercharmer, Time For Glory, Gusto Mucho,Flattering You, King Tiger, Boom Raider, Blackburn, Gomper Girl at Magnificent Lady sa distansiyang 1,800 meter race,

Nakalaan ang P750,000 garantisadong premyo kung saan ang P450,000 ay mapupunta sa kampeon sa event na suportado ng Philippine Racing Commission, (PHILRACOM) sa pamumuno ni chairman Reli De Leon. Ang nasabing event ay parte ng selebrasyon ng 9th Pasay Racingfest, may 12 karera ang inihain para sa mga karerista.

May kabuuang P2.55-milyong papremyo para sa mga mananalo, bukod sa mas malaki ang cash prize para sa taong ito ay mas kapana-panabik din ang mga karera na nilahukan ng mga premyadong kabayo sa bansa.

Magbabanatan naman sa 9th Pasay Rep. Tony Calixto Cup ang limang tigasing kabayo sa karera na may P500,000 total purse.

Pag-aagawan nina Don Julio, Cupid Song, Basheirrou, Gomezian at Eazacky ang premyong P300,000 kung saan ang distansiya ay 1,600 meter race.

May nakalaang P500,000 premyo rin ang 9th Pasay Emi Calixto-Rubiano Cup na paglalabanan nina Marilag, Downinsideprotection, Bombay Nights, Raintree Starlet, Palibhasa Lalake, Speed Fantasy, American Factor at Sudden Impact. Ito ay itatakbo sa distansiyang 1,600 meter.