ni Ador V. Saluta @Adore Me! | March 13, 2024
Bagama't naihatid na sa huling hantungan ang abo ng veteran actress na si Jaclyn Jose, may ilang netizens pa rin pala ang naninisi kay Andi Eigenmann at sa kapatid nitong si Gwen sa pagkamatay ng kanilang inang aktres.
Hirit ng ilang netizens, kung sana raw ay may ginawa para 'di agad ito namatay.
Pinalagan naman ito ng actress na si Rita Avila at masama ang loob sa mga taong nambabatikos sa mga anak ng yumaong si Jaclyn Jose na sina Andi at Gwen.
Sa post nito sa Instagram, ibinahagi ni Rita ang photo collage ng mga larawan nina Jaclyn, Andi at Gwen.
Kasabay nito ang caption upang ipagtanggol ang mga anak ng aktres.
Ani Rita, "Tulad ngayon, ang daming kuro-kuro. Sana kasi, ganito ang ginawa! Dapat kasi, ganyan ang ginawa. Bakit naman kasi ginanu'n?
"Kasama ka ba nila sa bahay mula ng isinilang ang mga anak ni Jaclyn Jose? Naranasan mo bang pumasok sa isip at katawan nila kaya alam mo ang tinahak ng bawat isa sa kanila?
Nasa lugar ka ba para kuwestyonin at ipa-guilty pa ang mga naiwan?
"I-REST IN PEACE NA MUNA PO ANG ISIP AT BIBIG kung walang buti ang idudulot n'yo sa mga naiwan.
"MASAKIT NA PO MASYADO ANG NANGYARI SA KANILA. Hinay-hinay po.
"Hindi lahat ng nababasa o nakikita n'yo ay totoo. Marami ang nasisilaw. Marami ang makakapal. Parang totoo pero hindi.
"Ipagdasal na lang natin si Jaclyn at ang kanyang pamilya.
"Sa isang post ko na ang wishful thinking ko ay sana may “KATE” din si Jaclyn, mabuting wish ‘yun para sa isang naging kaibigan dahil malungkot nga raw siya sa pagiging mag-isa at dahil alam ko ang advantage ng may kasamang nagmamahal, nag-aasikaso at nagpapasaya sa akin. PERO HINDI KO KINUWESTIYON ANG SITWASYON NIYA. WALANG KINALAMAN ‘YUN SA MGA ANAK NIYA. I TRUST HER AND HER CHILDREN FOR ALL THEIR DECISIONS."
Mananahimik na nga kaya ang mga bashers?