Righteous Ruby, larga sa Japan Cup sa Turf

ni Green Lantern @Renda at Latigo | January 19, 2022

Muling masisilayan sa pista ang matikas na si Righteous Ruby matapos magsaad ng paglahok sa 2023 PHILRACOM "Japan Cup" na ilalarga sa Metro Turf, Malvar - Tanauan City sa Batangas sa Linggo.

Bukas sa lahat ng registered 4-Year-Old & Above Imported/Local Horses at nakasali na rin sa mga karera ang nasabing event.

Maliban kay Righteous Ruby, ang ibang nominadong tatakbo sa distansiyang 1,800 meter race ay sina Bombay Nights, Enigmatic Linden, Runway Dreamer, Shastaloo, Speed Fantasy, Sudden Impact, Time For Glory at Treasure Hunting.

Sasakyan ni dating Philippine Sportswriters Association, (PSA) Jockey of the Year Awardee Jonathan Basco Hernandez, pakay ni Righteous Ruby na masungkit ang P600,000 premyo.

May nakalaan na P1-M guaranteed prize na ikakalat sa unang anim na kabayong tatawid sa meta sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Kukubrahin ng second placer ang P200,000, may P100,000 sa third habang tig-P50,000, P30,000 at P20,000 sa 4th hanggang sixth ayon sa pagkakahilera.

"Malaki rin ang premyo kaya siguradong todo paghahanda ang ginagawa ng trainers at hinete para manalo," saad ni Vergel Villahermosa, veteran karerista.

Mag-uuwi rin ang breeder ng winning horse na P50,000 habang P30,000 at P20,000 sa second at third.

Samantala, walong races ang pinakawalan ng Metro Manila Turf Club Inc. (MMTCI) kahapon ng Miyerkules kaya naging masaya ang mga karerista sa kanilang paglilibang.