Reaves, Alexander at Ingram, lusot sa tagumpay

ni Anthony E. Servinio - @Sports | December 17, 2021

Nakahanap ng hindi inaasahang bayani ang Los Angeles Lakers sa katauhan ni rookie Austin Reaves na ipinasok ang tres na may isang segundong nalalabi sa overtime upang ihatid ang 107-104 panalo kontra sa Dallas Mavericks sa NBA kahapon mula sa American Airlines Center. Hindi rin nagpahuli si Devonte Graham at tumira siya mula sa 61 talampakan sa busina upang ipanalo ang New Orleans Pelicans sa Oklahoma City Thunder, 113-110.

Tumanggap ng pasa si Reaves mula kay Russell Westbrook para sa palong puntos. Bago noon, itinabla ng tres ni Maxi Kleber ng Mavs ang iskor, 104-104, at 15 segundo sa orasan.

Sumandal ang Lakers sa patuloy na husay ni LeBron James na may 24 puntos at Westbrook na may 23 puntos. Dumagdag ng 20 puntos at 12 rebound si Anthony Davis.

Pareho rin ang kwento sa Pelicans-Thunder at matapang na tumira ng tres si Shai Gilgeous-Alexander para itabla ang laban na may 2.3 segundo sa orasan, 110-110. Wala nang timeout at agad binigay ni Josh Hart ang bola kay Graham at agad ibinato ito para mailusot ang tagumpay.

Namuno sa New Orleans si Brandon Ingram na may 34 puntos. Double-double si Jonas Valanciunas na 19 puntos at 16 rebound at 15 puntos si Graham.

Patuloy ang pag-angat ng Utah Jazz at giniba ang Los Angeles Clippers, 124-103, sa likod ng 27 puntos ni Donovan Mitchell at sinundan ni Gilas Pilipinas Jordan Clarkson na may 21 puntos. Tig-20 puntos sina Bojan Bogdanovic at Rudy Gobert na humakot din ng 17 rebound.