Puwedeng maging miyembro ng homeowners’ association kahit nangungupahan lang

ni Atty. Persida Rueda-Acosta - @Magtanong Kay Attorney | September 15, 2022

Dear Chief Acosta,

Ang officer sa homeowners’ association ng aming subdivision ay iniimbitahan kaming maging member ng nasabing asosasyon kahit na kami ay nangungupahan lamang dito. Ang sabi niya ay ayos lang diumano iyon at maaari rin naman kaming maging miyembro kahit kami ay nangungupahan lamang. Tama ba ang sinasabi niya? - Yra

Dear Yra,

Para sa iyong kaalaman, ang batas na nakasasaklaw sa iyong katanungan ay ang Section 6 ng Republic Act No. 9904 o mas kilala sa tawag na “The Magna Carta for Homeowners and Homeowners Associations”, kung saan nakasaad na:

“Section 6. Qualification of a Member. - A homeowner as defined under this Act shall be qualified to be a member of an association: Provided, however, That a lessee, usufructuary, or legal occupant shall have the right of a homeowner as set forth under this Act upon procurement of a written consent or authorization from the owner of the lot or housing unit.

x x x”

Dagdag pa ng Sec. 10, Rule III ng 2021 Revised Implementing Rules and Regulations of Republic Act No. 9904:

“Section 10. Qualifications of a Member. – xxx.

Except members of associations organized to avail of the benefits of the CMP, NHA projects and similar tenurial arrangements, a lessee of a member under a contract with a term of at least one (1) year may qualify to be a member and shall have the rights of a member upon procurement of a written consent or authorization from the owner of the lot and/or housing unit, and upon complying with the requirements of membership under the bylaws and the law.” (Binigyang-diin)

Samakatwid, maaaring maging miyembro ng homeowners’ association sa lugar ang lessee o nangungupahan ng bahay kung ang termino ng kanilang contract of lease para sa bahay ay hindi bababa sa isang taon at kung bibigyan sila ng may-ari ng bahay na ito ng written consent/authorization para sila ay maging miyembro ng nasabing kapisanan. Ibig sabihin, tama naman ang sinasabi ng nasabing officer na maaari kayong maging miyembro ng homeowners’ association ng inyong subdivision basta masusunod ninyo ang mga nabanggit na pamantayan ng batas at ng mga itinakdang requirements ng homeowners’ association.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.