Pulis hinoldap, 2 nakamotor todas sa engkuwentro

ni Gina Plenago @News | November 13, 2026

Photo: Circulated

Dedbol ang dalawang lalaking magkaangkas sa motorsiklo matapos makipagbarilan umano sa mga awtoridad kasunod ng panghoholdap sa isang nakasibilyang pulis sa Brgy. Ususan, Taguig City, nitong Huwebes, Nobyembre 12.

Kinilala ang isa sa mga nasawi na si alyas Flor, 47, na ayon sa pulisya ay lider umano ng carnapping at robbery group na sangkot sa hindi bababa sa 10 kaso ng carnapping. Inaalam pa ang pagkakakilanlan ng kanyang kasama.

Alas-12:40 ng tanghali nang tutukan ng baril at agawan ng kwintas ang nakasibilyang pulis na nagsasagawa ng surveillance sa Pedro Cayetano Boulevard.

Agad itong tumawag sa 911, ngunit pinaputukan umano ng mga suspek ang mga rumespondeng pulis, dahilan upang masugatan sa balikat ang isang intelligence operative na isinugod sa The Medical City Taguig.

Narekober sa pinangyarihan ang dalawang baril, mga basyo, motorsiklo, helmet at ang ninakaw na kuwintas.

Tiniyak ni Southern Police District director Brig. Gen. Rodel Pastor ang mahigpit na pagpapatupad ng batas laban sa kriminalidad, kasabay ng pagbibigay-diin sa propesyonalismo at pananagutan ng mga pulis.