Prosekusyon: Pag-alis ng mga testigo, hindi ‘bluff’

by BRT @News | October 3, 2026

Photo: Lead prosecutor Batangas Rep. Gerville Luistro at prosecution team at Antonio Trillanes - Senate PH / File

Hindi umano “bluff” o paraan para lituhin ang depensa ang paulit-ulit na pag-alis ng prosecution sa kanilang mga testigo sa impeachment trial ni VP Sara Duterte.

Ayon kay lead prosecutor Batangas Rep. Gerville Luistro, regular nilang sinusuri ang listahan ng mga testigo para malaman kung may bago pa silang maibibigay na impormasyon o mauulit lamang ang mga naunang ebidensiya.

Kabilang sa huling inalis sa listahan si dating Sen. Antonio Trillanes IV, na dapat sanang tumestigo para sa Article II tungkol sa umano’y unexplained wealth at undeclared assets ni Duterte.

Ayon naman sa prosecution counsel na si Lorna Kapunan, saklaw na ng judicial notice ng impeachment court ang nauna nang testimonya ni Trillanes sa House justice committee kaya hindi na kailangan ang kanyang pagharap sa korte.