Impeachment trial, ililipat sa hapon

ni Mylene Alfonso @News | August 23, 2026

Photo: Impeachment trial ni VP Sara Duterte - Senate of the Philippines

Posibleng ilipat sa hapon ang impeachment trial ni Vice President Sara Duterte-Carpio simula Setyembre.

Ayon kay Senator-Judge Panfilo "Ping" Lacson, nangingibabaw sa mga miyembro ng Senate majority bloc ang pananaw na sulitin ang oras para sa impeachment trial sa pamamagitan ng pagdaraos ng mga legislative session sa umaga at paglilipat ng trial sa hapon at posibleng pagpapahaba nito hanggang gabi.

Sa ilalim ng panukalang setup, maaaring idaos ang regular na session ng Senado mula Lunes hanggang Miyerkules, alas-10 ng umaga hanggang alas-2 ng hapon, at magsisimula ang trial ng alas-2:30 ng hapon hanggang alas-7:30 ng gabi.

Ani Lacson, walang pressure na kailangang eksaktong matapos ang proceedings ng alas-7:30 ng gabi, at maaari itong umabot hanggang bandang alas-10 ng gabi hanggang alas-11 ng gabi kung kinakailangan.

Dagdag niya, magiging pormal ang usapin sa caucus ng mga senador sa susunod na linggo, kung saan kokonsultahin din ang mga miyembro ng minority bloc.

Walang majority, minority sa impeachment court... Raffy, sopla kay Chiz

ni Mylene Alfonso @News | July 22, 2026

Photo: Senate PH

Hiniling ni Senator-Judge Raffy Tulfo sa Senate impeachment court na maging pare-pareho ang pagpapatupad ng dalawang minutong limitasyon sa pagsasalita ng mga senator-judge sa impeachment trial ni Vice President Sara Duterte.

“Bakit 'pag sa kabila, pinapayagan sila 5, 10 minutes? Bakit ‘pag sa amin sa majority, kina-cut kaagad 'yung mic pagdating ng 2 minutes?” ani Tulfo.

“Nakakahalata na kami. So, dapat 'pag sinabing 2 minutes, 2 minutes,” wika pa niya.

Bilang tugon, sinabi ni Presiding Officer Francis ‘Chiz’ Escudero na kinikilala niya ang naging pahayag ni Tulfo, ngunit iginiit na walang majority o minority sa impeachment court.

“We are all senator-judges,” ani Escudero, bago paalalahanan si Sen. Robin Padilla na “wind up” na ang kanyang mga tanong kay National Bureau of Investigation (NBI) Director Melvin Matibag.

Samantala, sinabi naman ni Sen. Alan Peter Cayetano na nakatanggap din siya ng mga paalala kaugnay ng itinakdang oras ng pagsasalita. Nauna ring humiling si Sen. Panfilo Lacson ng dagdag na oras upang makapagtanong kay Matibag.

Hiniling ni Cayetano sa impeachment court na ipagpatuloy ang pagiging maluwag sa pagpapatupad ng oras.

“If we can’t ask questions, baka magkaroon ng motion, mas lalong tatagal. You’ve been doing it naman, just ask to wrap up,” pagtatapos ni Cayetano.

Tanong sa witness, sablay... Risa, sopla kay Pia

ni Mylene Alfonso @News | July 8, 2026

Photo: Senate PH

Naghain ng mosyon si Senator-judge Pia Cayetano na i-strike out o burahin sa rekord ng impeachment court ang naging tugon ng prosekusyon sa tanong ni Senator-judge Risa Hontiveros sa nagpapatuloy na impeachment trial ni Vice President Sara Duterte.

Ayon kay Cayetano, ang naging sagot ng prosekusyon ay mistulang closing statement na at hindi na simpleng tugon sa tanong ng senator-judge.

“When we allow this to happen, na-shortcut na natin ‘yung process!” giit ni Cayetano.

Nauna rito, kinuwestiyon ni Hontiveros ang prosekusyon matapos iprisinta ang mga video kung saan umano’y nagbitiw ang Bise Presidente ng mga pahayag na may kaugnayan sa banta ng asasinasyon.

Sa pagdinig, tinanong ni Hontiveros ang prosekusyon kung paano mapatutunayan ng mga naturang pahayag na talagang kumuha o nagkontrata si Duterte ng isang assassin.

Bilang tugon, sinabi ni Prosecutor Virgil Ligutan na bagama’t hindi direktang pinatutunayan ng mga video na umupa ng assassin si Duterte, maaari pa rin itong tanggapin bilang ebidensiya sa ilalim ng Rule 130, Section 35 upang ipakita ang umano’y intensiyon, kaalaman, plano, at pattern of conduct ni Duterte.

Ayon kay Ligutan, ang mga pahayag noong Nobyembre 24 ay nagsilbing kasukdulan ng sunod-sunod na umano’y mga pahayag na nagpapakita ng intensiyon ng Bise Presidente.

Samantala, pinaalalahanan ni Presiding Officer Francis Escudero ang mga senator-judges na iwasan ang pagtatanong ng mga usaping maaaring magtulak sa pagbuo ng konklusyon hinggil sa kaso habang nasa yugto pa lamang ng pagpresenta ng ebidensiya.

Nagpasya rin si Escudero na i-table o ipagpaliban muna ang pagdedesisyon sa mosyon ni Cayetano.