Gumawa ng SALN ni VP Sara, tanga — Tulfo

ni Mylene Alfonso @News | November 11, 2026

Photo: Senator Judge Raffy Tulfo - Senate PH

Pinuna ni Senator-judge Raffy Tulfo ang taong naghanda ng Statement of Assets, Liabilities, and Net Worth (SALN) ni Vice President Sara Duterte.

"Kung sinuman 'yong nag-prepare ng SALN ni VP Sara, I'm not gonna use a word na medyo masakit, [ay] tanga. He or she could have consulted the VP na 'ma'am, bawal ito, hindi natin puwedeng ilagay 'to sa SALN mo.' Marami siyang mga abogado... that could have advised her kung ano 'yung dapat ilagay sa SALN at hindi," ani Tulfo.

Binigyang-diin naman ni Atty. Paolo Panelo, spokesperson ni Duterte na mas mainam na magharap ang kampo ng Bise Presidente ng mga third-party witness na may dokumentong magpapatunay sa kanilang testimonya, sa halip na umasa lamang sa pahayag ng mismong naghanda ng SALN ng Bise Presidente.

Ayon kay Panelo, maaaring maging self-serving ang testimonya ng naghanda ng SALN kung hindi ito susuportahan ng ebidensya.

Aniya, mas mahalagang magmula sa mga independent witness ang testimonya at nakabatay ito sa aktuwal na mga dokumento.

Nilinaw din ni Panelo na hindi siya bahagi ng defense team at ang desisyon kung tetestigo si Duterte ay gagawin ng kampo nito sa tamang panahon, matapos maiharap ang mga ebidensya.

Sen. Mark, lumipat sa majority — Zubiri... Walang kinalaman sa conviction ni VP Sara

ni Mylene Alfonso @News | October 9, 2026

Photo: Mark Villar - Senate of the Philippines

Walang kinalaman sa botohan para sa conviction ni Vice President Sara Duterte ang pagbalik ni Sen. Mark Villar sa mayorya mula sa minority group, ayon kay Senate Majority Floor Leader Juan Miguel “Migz” Zubiri.

“No, not at all. You know, Senator Mark has always been with the majority anyways from the very beginning. When we started, kalilipat lang niya sa minority but we had a heart-to-heart discussion with Senator Mark. Gusto niya talagang magtrabaho at gusto niya ng mga committees na pwede siya makatrabaho, makaikot and be a productive member of the Senate,” sabi ni Zubiri.

“So, this for me is just welcoming back a member of the majority once again, and he’s raring to go. As a matter of fact, kausap namin siya kanina, ang dami niya mga panukalang gustong ipasa, ang dami niya gustong magkaroon po siya ng consensus building sa buong bansa…” dagdag pa niya.

Ayon pa kay Zubiri, wala ring kinalaman ang pagbalik ni Villar sa mayorya para mabuo ang kinakailangan 14 o 16 boto para sa conviction ng Bise Presidente.

“No, nothing to do whatsoever. You know, being a member of the majority, doesn’t automatically mean that you will vote for conviction or for acquittal? Hindi po ibig sabihin yun. Baka may members kami sa majority, biglang mag-vote for acquittal din,” ani Zubiri.

“At baka may members din ng minority that will vote for conviction. It all has to do with evidence. Evidence presented,” dagdag pa niya.

Isa pa, lilipat sa majority... Sen. Mark, kumalas na sa minority

ni Mylene Alfonso @News | October 9, 2026

Photo: Mark Villar - Senate of the Philippines

Pormal nang lumipat si Senador Mark Villar sa Senate majority bloc matapos siyang mahalal bilang miyembro ng Commission on Appointments (CA) at chairman ng Senate Committee on Public Works kahapon.

Si Senate Majority Leader Juan Miguel “Migz” Zubiri ang nagmosyon para ihalal si Villar sa dalawang posisyon. Walang senador ang tumutol sa kanyang pagkakahalal.

Kinumpirma mismo ni Zubiri na ang mga bagong posisyon ni Villar ay bahagi ng kanyang pagpasok sa majority.

"Yes. We just elected him to the CA and Public Works committee as part of the majority," ani Zubiri.

Sa CA, pinalitan ni Villar si Zubiri. Ang Commission on Appointments ay ang bicameral body na may kapangyarihang aprubahan o tutulan ang mga appointment ng Pangulo sa ilang matataas na posisyon sa pamahalaan, kabilang ang mga department secretary, mga ambassador at ilang opisyal ng Armed Forces.

Habang pinalitan ni Villar si Senate President Pro Tempore Vicente “Tito” Sotto III bilang chairman ng Senate Committee on Public Works.

Kasabay nito, inihalal din si Senate Minority Leader Alan Peter Cayetano bilang miyembro ng CA, kapalit ni Sen. Loren Legarda.

Naganap ang paglipat ni Villar mula minority patungo sa majority ilang linggo matapos niyang suportahan ang mosyon na umapela sa desisyon noong Hulyo 6 hinggil sa voting threshold sa impeachment trial ni Vice President Sara Duterte.

Dahil sa paglipat ni Villar, umakyat sa 14 senador ang majority bloc, habang 10 senador naman ang nananatili sa minority.

Apat sa mga senador sa minority ang kasalukuyang hindi dumadalo sa mga sesyon.

Kabilang dito sina Senators Jinggoy Estrada at Rodante Marcoleta, na kapwa nakakulong kaugnay ng magkahiwalay na plunder charges; si Sen. Ronald “Bato” dela Rosa, na hindi dumadalo sa sesyon dahil sa arrest warrant mula sa International Criminal Court; at si Sen. Legarda, na ilang buwan nang naka-extended medical leave. 

Samantala, sa isang panayam, ibinulgar ni Sen. Raffy Tulfo, may isa pa umanong senador mula sa minority bloc na posibleng lumipat sa majority.

Gayunman, tumanggi si Tulfo na tukuyin kung lalaki o babae ang naturang senador.