Pramis ni Pacman na ‘di magboboksing ‘pag nanalo, napako na!

ni Pablo Hernandez III - @Prangkahan | July 02, 2021

TROPANG DUTERTE, TOP SA DAILY COVID CASES AND DEATHS; BAGSAK SA COVID RESILIENCE—Matapos itala ng World Health Organization (WHO) kamakalawa (June 30) ang Pilipinas na number 1 sa maraming tinatamaan ng COVID-19 at namamatay araw-araw sa virus sa buong Western Pacific Region ay itinala naman kahapon (July 1) ng Bloomberg na ikalawa sa pinakakulelat ang ‘Pinas sa 53 bansa sa mundo pagdating sa resilience sa COVID-19 pandemic.

Mantakin n’yo, may ganyan na palang datos ang WHO at Bloomberg, tapos kung makapagbida ang tropang Duterte na sina Presidential spokesman Harry Roque, Presidential Legal Counsel Salvador Panelo at Pastor Quiboloy parang ang galing-galing ng Duterte gov’t., mga buwisit!

◘◘◘

SA PANAHON NG KRISIS, TANTANAN NA MUNA ANG ‘RUN SARA RUN’, ‘DIGONG FOR VP’ AT ‘DUTERTE-DUTERTE’—Dahil sa krisis na dulot ng COVID-19 ay ayaw munang pag-usapan nina Vice-Pres. Leni Robredo, Sen. Manny Pacquiao, Sen. Christopher “Bong” Go, Manila Mayor Isko Moreno at ex-Sen. Bongbong Marcos ang pulitika, dahil ayon sa kanila ay dapat magpokus muna ang lahat sa paglaban sa COVID-19 pandemic.

Kaya’t sana ay tantanan muna nina Roque, Panelo at Quiboloy ang kadadakdak nang “Run Sara Run”, “Digong for VP” at “Duterte-Duterte 2022” kasi hindi biro ang report ng WHO na top ang ‘Pinas sa dami ng daily COVID cases at deaths sa Western Pacific Region at sa report ng Bloomberg na bagsak ang ‘Pinas sa COVID-19 resilience, period!

◘◘◘

NALIMUTAN NI PACMAN NA SINUNGALING DIN SIYA—Ang sabi ni Pacquiao, hindi siya sinungaling na tao.

Kung ganun, nalimutan na pala ni Pacman ang sinabi niya sa publiko noong kumakandidato siyang senador na manalo lang siya ay hindi na siya magbo-boxing, pero nang manalo, boksing pa rin nang boksing, ha-ha-ha!