Post Office “Express Pada-LOVE”, inilunsad sa araw ng mga puso

ni Fely Ng - @Bulgarific | February 12, 2022

Hello, Bulgarians! Ibinabalik ng Philippine Postal Corporation (Post Office) ang Express Pada-LOVE ngayong Araw ng mga Puso. Ayon sa Post Office, kahit ang COVID-19 ay hindi mapipigilang iparamdam sa mga nagmamahalan at minamahal ang pagdiriwang ng Valentine season.

Ngayong taon, muling binuhay ng Post Office ang tradisyunal na pagpapadala ng flowers, chocolates, stuffed toys at iba pang gift items mula Pebrero 7 -14 sa pamamagitan ng Domestic Express Mail Delivery Service (DEMS).

Simula noong Pebrero 7, tumatanggap ang Post Office ng mga orders mula sa Valentine’s Day booths na nakakalat sa lobby ng Manila Central Post Office upang ihatid ang mga bulaklak, novelty at food items via DEMS sa araw mismo ng Valentine’s Day.

Ang isang linggong selebrasyon ng Valentine’s Day ay magtatagal hanggang sa Araw ng mga Puso ngayong Pebrero14, kung saan maghahatid ang mga kartero ng ipinadalang Valentine’s Day gift items, tulad ng flowers, chocolates at greeting cards na in-order at sorpresang ipinadala via Express Pada-LOVE.

Dagdag pa ng Post Office, siguradong magiging matingkad ang selebrasyon kapag sinamahan ng espesyal na harana tampok ang “Singing Kartero’s (mailman) sa halagang abot-kaya.

Layunin ng “Express Pada-LOVE” na maghatid ng simple, ngunit makabuluhan at di-malilimutang karanasan para sa mga minamahal sa buhay.

Ang Post Office ay maghahatid ng mga orders via door to door sa pamamagitan ng Domestic Express Mail Service (DEMS) kahit saan lugar sa Metro Manila. Para sa mga nagnanais na um-order, tumawag lamang sa telepono (02) 8527-0135 at hanapin si Mr. Jeffrey Catayong.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.